Ish-kryedemokrati Lulzim Basha ndodhet për vizitë në Preshevë, ku ka takuar kryetaren e komunës, Ardita Sinani.
Përmes një postimi në rrjetet sociale, Basha shkruan se Sinani i ka shprehur shqetësimin për vendimin e fundit të presidentit serb Aleksandër Vuçiç për shërbimin e detyrueshëm ushtarak, si dhe mungesën e investimeve në zhvillimin ekonomik dhe infrastrukturë.
Sipas Bashës, pasivizimi i adresave, ose spastrimi i heshtur etnik është një shqetësim i madh që duhet të adresohet nga çdo shqiptar, në çdo institucion ndërkombëtar. Ai shton më tej se Serbia po bën gjithçka që shqiptarëve në Luginën e Preshevës t’u vështirësohet jeta dhe të emigrojnë, duke ndryshuar me metoda kriminale, të heshtura ndryshimin demografik në këto zona.
Sipas Bashës, Vuçiç bërtet për të drejtat e serbëve të Kosovës dhe pse kanë më shumë të drejta së çdo pakicë tjetër në Europë, ndërkohë që diskriminon shqiptarët e Preshevës, Bujanocit e Metvegjës.
Ai thotë se shqiptarëve të Luginës së Preshevës u mohohet përdorim i simbolit, tekstet mësimore në gjuhën amtare, nuk u njihen diplomat e Republikës së Kosovës, nuk u jepet mundësia të punësohen në institucione shtetërore, apo të kenë mundësi punësimi e shërbimi shëndetësor.
Basha bën apel që politika shqiptare në Shqipëri, Kosovë, Maqedoni të Veriut e diasporë të ngrejë zërin për këtë sjellje kriminale ndaj shqiptarëve në Preshevë, Bujanoc e Metvegjë.
Postimi i plotë:
Kënaqësi që të takohesha në Komunën e Preshevës me Kryetaren e Komunës Ardita Sinani dhe nën Kryetarin Ragmi Mustafa.
I përgëzova për vendosmërinë dhe ndjenjën e lartë të përgjegjësisë me të cilat përballen si përfaqësues të bashkëkombasve tanë. Sfidat janë të mëdha, por puna e jashtëzakonshme e Kryetares Sinani dhe e nën Kryetarit Mustafa është një shembull inkurajues përkushtimi politik dhe kombëtar.
Pasivizimi i adresave, ose spastrimi i heshtur etnik është një shqetësim i madh që duhet të adresohet nga çdo shqiptar, në çdo institucion ndërkombëtar.
Ndërsa presidenti i Serbisë, me mbështetjen e të cilit një vit më parë u krye një agresion ndaj Republikës së Kosovës në Bajnskë, bërtet për të drejtat e serbëve të Kosovës dhe pse kanë më shumë të drejta së çdo pakicë tjetër në Europë, diskriminon shqiptarët e Preshevës, Bujanocit e Metvegjës.
Shqiptarëve të Luginës së Preshevës u mohohet përdorim i simbolit, tekstet mësimore në gjuhën amtare, nuk u njihen diplomat e Republikës së Kosovës, nuk u jepet mundësia të punësohen në institucione shtetërore, apo të kenë mundësi punësimi e shërbimi shëndetësor.
Zonja Sinani më shprehu shqetësimin edhe për vendimin e fundit të Vuçiç për Shërbimin e detyrueshëm ushtarak, si dhe mungesën e investimeve në zhvillimin ekonomik dhe infrastrukturë.
Serbia po bën gjithçka që shqiptarëve në Luginën e Preshevës t’u vështirësohet jeta dhe të emigrojnë, duke ndryshuar me metoda kriminale, të heshtura ndryshimin demografik në këto zona.
Prandaj, sa nuk është vonë, duhet që politika shqiptare në Shqipëri, Kosovë, Maqedoni të Veriut e diasporë të ngrejë zërin për këtë sjellje kriminale ndaj shqiptarëve në Preshevë, Bujanoc e Metvegjë.
Koha, energjia dhe përkushtimi im për shqiptarët e Luginës së Preshevës nuk do të mungojnë kurrë!
