Karabinierët e stacionit Marsciano, në Peruxhia të Italisë, njoftuan se arrestuan një 21-vjeçar shqiptar, pa leje qëndrimi, për posedim me qëllim shpërndarje droge.
Sapo pa karabinierët, i riu ka tentuar të arratiset me makinën e tij në zonën e Marsciano, por kur efektivët e rrethuan, është ndaluar dhe i është nënshtruar kontrollit personal dhe të automjetit.
Me vete iu gjetën 46 doza me kokainë, të paketuara në formë veze dhe me një peshë totale 35 gramë. Droga u gjet e fshehur brenda një çante të vogël, të vendosur nën sediljen e shoferit, shkruan “PerugiaToday”.
Në përfundim të hetimeve, 21-vjeçari u shpall i arrestuar (emri i tij nuk u publikua në media) dhe pas verifikimit u urdhërua nga Gjykata e Spoleto (rajoni i Umbrias) edhe dëbimi i menjëhershëm nga territori.
I dyshuari konfirmohet se u riatdhesua më pas me një fluturim për në Shqipëri, kurse droga u sekuestrua.
