Prokuroria e Posaçme (SPAK) i ka dhënë leje ish-zëvendësministrit të Shëndetësisë, Klodjan Rrjepaj për të dëshmuar në komisionin hetimor për koncesionet në shëndetësi.
Ditën e nesërme ai do të lerë qelinë e burgut dhe nën shoqërimin e efektivëve do të paraqitet fizikisht në Kryesinë e Kuvendit për të marrë pjesë në komision.
Ai do të merret në pyetje nga deputetët e opozitës dhe mazhorancës në lidhje me koncesionin e sterilizimit, e cila është edhe afera që e ka vënë në pranga, duke u akuzuar për “shpërdorim detyre”. Kjo është hera e parë që një i paraburgosur merret në pyetje nga deputetët.
Po ashtu, do merren në pyetje edhe dy prej anëtarëve të komisionit që shpalli fituesin e koncesionit, Marsela Serjani dhe Petro Mersini. Të dy janë në masë detyrim paraqitjeje, por edhe për ta SPAK ka dhënë leje që të pyeten nga Komisioni.
Ndërkohë, më 3 tetor është parashikuar që të merret në pyetje edhe ish-ministrit të Shëndetësisë Ilir Beqaj, i cili po ashtu ndodhet në burg, ndërsa pritet të dëshmojë edhe biznesmeni Ilir Rrapaj.
