Policia kufitare ka arrestuar një punonjës të aeroportit të Rinasit, si dhe ka proceduar penalisht një punonjës tjetër, pasi dyshohet se vidhnin bizhuteri të ndryshme nga bagazhet e pasagjerëve.
Në pranga është vënë shtetasi Leidjon Zeneli, 19 vjeç, dhe është proceduar në gjendje të lirë shtetasi Mehmet Sula, 24 vjeç, të dy banues në Krujë. Ata akuzohen për kryerjen e veprës penale “Vjedhja”.
Punonjësio Leidjon Zeneli është konstatuar pranë kontenierëve ku ndërrohen punonjësit e bagazheve, teksa fshihte bizhuteri të dyshuara të vjedhura nga bagazhet e pasagjerëve.
Më tej, është kryer kontroll në hapësirën ku mbanin sendet personale, Leidjon Zeneli dhe Mehmet Sula dhe aty janë gjetur 1250 euro dhe bizhuteri të tjera, të dyshuara të vjedhura nga bagazhet e pasagjerëve.
Materialet procedurale i kaluan Prokurorisë së Tiranës, për veprime të mëtejshme.
Policia Kufitare e Rinasit apelon për të gjithë pasagjerët, që për arsye sigurie, paratë dhe sendet me vlerë t’i mbajnë në çantat e dorës, jo në bagazhet e stivës, pasi kompanitë ajrore nuk mbajnë përgjegjësi për to.
