Një 16-vjeçar grek është arrestuar të mërkurën në një zonë rurale të Bashkisë Mylopotamos. Mësohet se i mituri ishte udhëzuar nga mamaja e tij dhe njerku shqiptar 50-vjeçar se si të kujdesej për bimët e kanabisit.
16-vjeçari u kap në flagrancë teksa shkoi për të ujitur plantancionin e kanabisit mëngjesin e së mërkurës me një kamion ferme të cilin e drejtonte pa patentë. Policia sekuestroi 16 bimë kanabisi me një gjatësi prej 3 metrash.
Pas kësaj u bastis edhe shtëpia e familjes së të miturit nga ku u gjetën dhe sekuestruan dy bime kanabisi të thara, një sasi e vogël kanabisi, dy peshore precize dhe dy celularë. Për pasojë u arrestuan nëna dhe njerku i 16-vjeçarit.
Të tre së bashku u dërguan në prokurorinë themelore të Rethymno-s, ku u akuzuan për kultivim, posedim dhe trafik droge dhe moskujdesje ndaj të miturit, i cili akuzohet edhe për shkelje të Kodit të Qarkullimit Rrugor pasi nuk kishte patentë shoferi.
