Një krim tronditës është regjistruar të dielën në lagjen Teisseire të Grenoble në Francë, ku në një atentat mafioz është vrarë një shqiptar dhe janë plagosur tre të tjerë.
Ditën e sotme mediat vendase kanë publikuar identitetin e viktimës, ku bëhet fjalë për 47-vjeçarin Ylli Bezhani, i cili ka marrë 5 plumba në trup. Po ashtu kanë mbetur të plagosur rëndë edhe djali 24-vjeçar dhe nipi 21-vjeçar i viktimës, si dhe një tjetër shqiptari, të cilët po marrin trajtim në spital.
Autori i krimit, i cili dyshohet se ka qenë një shtetas shqiptar, lëvizte me një skuter elektrik dhe pasi u afrua drejt “shënjestrave”, hapi zjarr drejt tyre. Autori shkarkoi karikatorin e pistoletës drejt 4 shqiptarëve dhe më pas u largua menjëherë.
Policia është ende në kërkim të tij, por deri më tani nuk ka asnjë informacion. Ngjarja ndodhi pak para orës 20:00 në një zonë të qetë të qytetit, rreth 100 metra larg nga kryqëzimi me Avenue Paul-Cocat.
Besohet se mes dy grupeve ka pasur përplasje, por po verifikohen të gjitha pistat e mundshme, përfshi edhe ato që kanë të bëjnë me bizneset ilegale.
Sipas mediave të huaja, Bezhani është sipërmarrës individual me qendër në ARTIGUES-PRES-BORDEAUX (33370), i specializuar në sektorin e punimeve të mbulimit të dyshemeve dhe mureve.
Prokurori i Grenoble, Eric Vaillant, njoftoi se është hapur një hetim për “vrasje” dhe “tentativë vrasjeje”.
