Kryeministri i Kosovës, Albin Kurti ka reaguar në lidhje me protestën e serbëve ditën e sotme në Mitrovicë të Veriut, të cilët kundërshtuan hapjen e urës së Ibrit.
Përmes një postimi në rrjetet sociale, Kurti shkruan se protestat janë e drejtë demokratike, ndërsa lajmëron mbajtjen e një takimi bashkëbisedues nesër në Mitrovicën e Veriut për hapjen e urës së Ibrit. Ai ka ftuar edhe serbët që të marrin pjesë në këtë takim, ku sipas tij, do të mund të njoftohen mbi përfitimet nga hapja e urës.
“Komuna e Mitrovicës së Veriut nesër prej orës 11:00, në hapësirat e Kuvendit Komunal, organizon takim dhe bashkëbisedim me qytetarë, aktivistë të shoqërisë civile dhe përfaqësues të mediave lokale me temën “Bashkëpunimi ndëretnik, këshillim komunal për siguri në bashkësi, bashkëpunimi në mes të institucioneve dhe shoqërisë civile”.
I ftoj bashkëqytetarët tanë të komunitetit serb që të marrin pjesë në këtë diskutim të përbashkët në të cilin do të mund të njoftohen mbi përfitimet nga hapja e urës dhe të shprehin shqetësimet e tyre të cilat do të trajtohen nga përfaqësuesit tanë institucionalë dhe institucionet e vendit.
Për shumë gjatë Ura e Mitrovicës mbi Ibër na ka mbajtur në distancë. Asaj padrejtësisht i është dhënë epiteti i ndasisë dhe marrëdhënieve jonormale. Urat na bashkojnë, e bashkë le ta bëjmë atë simbol të normalizimit”, shkruan Kurti.
