Prokuroria i ka dhënë leje 41-vjeçarit Klementin Islamajt për t ë marrë pjesë në varrimin e dy prindërve të tij.
Lajmi konfirmohet nga burime për mediat, teksa Klementin Islamaj do të marrë pjesë në ceremoninë mortore që zhvillohet në orën 11:00 në fshatin Shalës të Konispolit, i shoqëruar nga efektivë të Komisariatit të Policisë Sarandë.
41-vjeçari u arrestua ditën e djeshme, pasi akuzohet për vrasjen e babait të tij, Hysen Islamaj, 69 vjeç, duke e shtyrë nga shkallët, pasi ky i fundit i kishte vrarë me sopatë nënën e tij 66-vjeçare Shano Islamaj.
Pozitat e Klementin Islamajt para ligjit duken të lehtësuara, pasi nga të gjitha provat dhe faktet, duket se vrasja e 69-vjeçarit Hysen Islamaj nuk ka ardhur as në formë hakmarrje për vrasjen e nënës së Klementinit e as si rrjedhojë e dashjes së drejtpërdrejtë nga ana e tij. Nuk dihet ende se çfarë akuze ka ngritur Prokuroria ndaj 41-vjeçarit, por burime bëjnë me dije se rrethanat e ngjarjes janë lehtësuese në favor të autorit të dyshuar.
Me lot në sy para efektivëve, Islamaj ka dëshmuar se nuk donte që ta vriste të atin, por sipas tij, ky i fundit është penguar, pasi ai e ka shtyrë për ta larguar nga vetja. Gjithashtu, ai ka dëshmuar se i ati ka qenë i dhunshëm me nënën e tij.
Krimi i rëndë në familje ndodhi mëngjesin e 6 gushtit. Gjatë një sherri në banesë, 69-vjeçari, Hysen Islamaj ka goditur disa herë me sëpatë bashkëshorten Shano Islamaj, duke e lënë të vdekur në vend. Skenat e tmerrshme ndodhën para fëmijëve të Klementin Islamajt, të cilët jetonin në banesë me gjyshërit. Burimet thane se ka qenë mbesa 10-vjeçare, që ka telefonuar të atin duke i thënë se gjyshi ka vrarë gjyshen. Klementin Islamaj i cili gjendej në kafen e fshatit është kthyer në banesë dhe pasi ka gjetur nënën të pajetë dhe për këtë arsye dyshohet se ka shtyrë nga shkallët të atin, i cili për shkak të goditjes në kokë humbi jetën.
