Drejtuesit e Borussias së Dortmundit vazhdojnë të përforcojnë skuadrën. I radhës që është bashkuar me nënkampionët e Europës është Yan Couto, 22-vjeçari që bën të gjithë rolet e linjës së djathtë.
Futbollisti brazilian është në pronësi të Manchester Cityt, teksa dy sezonet e fundit e kaloi i huazuar në Spanjë te Girona. Skuadër me të cilën shkëlqeu duke regjistruar 2 gola dhe 12 asistime në 59 takime në La Liga.
Me të njëjtën formulë zbarkon edhe në “Signal Iduna Park”, me drejtuesit e Dortmundit dhe Cityt që do të ulen sërish në tryezën e bisedimeve në verën e vitit 2025 nëse plotësohen disa kritere nga futbollisti latin.
Couto nuk e fshehu lumturinë e tij për transferimin në një ndër skuadrat më të forta gjermane. Dhe mbi të gjitha me një nga tifozeritë më spektakolare dhe të zjarrta në planet.
“Për mua është një ëndërr e realizuar. Borussia Dortmund është një klub i veçantë. Çdo fëmijë në Brazil e di se sa i madh është ky klub dhe i njeh tifozët e mrekullueshëm të Murit të Verdhë.
Mezi po pres të vesh fanellën e Dortmundit për herë të parë për të përjetuar emocionet e stadiumit fantastik”, u shpreh braziliani. Përforcimi i katërt për ekipin e Nuri Sahin pas Anton, Guirassy dhe Gross.
