Prokuroria e Posaçme (SPAK) ka lëshuar rreth 30 urdhër-arreste të reja në vijim të operacionit “Plumbi i Artë”, bazuar në dëshmitë e të penduarit të drejtësisë, Nuredin Dumani, teksa operacioni ka filluar të ekzekutohet që prej mbrëmjes së djeshme.
Pjesa më e madhe e emrave për të cilët është lëshuar urdhër-arresti janë personazhe të njohur të botës së krimit në Elbasan, të cilët, janë arrestuar më herët, janë shpallur në kërkim më herët apo ndodhen jashtë vendit.
Nga dëshmitë e reja të Nuredin Dumanit janë zbardhur 6 ngjarje kriminale të regjistruara në Elbasan, Rrogozhinë dhe Berat.
Më konkretisht masakra e regjistruar në Bradashesh më 29 dhjetor 2018, ku u ekzekutua Endrit Alibej alias Ravik Dylgjeri, i njohur me nofkën “Tarzani”, bashkë me xhaxhain Arben Dylgjerin dhe turkun Erdal Durunai. Ky atentat dyshohet se është organizuar nga Mikael Qosja alias Kamami ose siç thirret ndryshe “Keli i Kiçit”, teksa është porositur nga vëllezërit Çopja që nga Dubai, me të cilët kishte përplasje grupi i “Tarzanit”. I përfshirë dyshohet se ka qenë dhe i shumëkërkuari i drejtësisë Talo Çela.
Gjithashtu është zbardhur edhe vrasja e Klevis Kapllanit, i cili u gjet i vrarë me 14 plumba brenda automjetit të tij më 15 shtator 2020 në fshatin Sinaballaj të Rrogozhinës. Klevis Kapllani ishte mik i ngushtë i Nuredin Dumanit, që solli dhe përplasjen me Talo Çelën. Nuredin Dumani dyshonte se Talo Çelo ishte i përfshirë në ngjarje dhe në shenjë hakmarrje,ekzekutoi Bujar Çelën, vëllain e Talo Çelës, 2 ditë pas kësaj ngjarje.
Po ashtu është zbardhur dhet atentati ndaj dy vëllezërve Klevi dhe Aldo Baho, ngjarje e ndodhur rreth orës 00:45 në fshatin Murras të Elbasanit, sapo kishte nisur procesi i numërimit të votave për zgjedhjet e 30 Qershorit të vitit 2019. Ndaj tyre u zbrazën 24 plumba, teksa Klevi Baho humbi jetën dhe vëllai i tij mbeti i plagosur.
Përveç këtyre ngjarje, janë zbardhur edhe disa krime të tjera.
SPAK ka lëshuar urdhër-arresti për personazhe si: Armis Stafa, Maksim Koçi, Erzen Çopja, Franc Bako alias Çopja, Hajdar Bako alias Çopja, Mikael Qosja, Guri Biba, Renato Masuku, Leonardo Rragami, Talo Çela, Altin Kamami, Rexhino Doçi, Arben Lamçja, Arsen Mema, Eljo Bitri, Leam Rragami, Elvis Daka alias Dragoviç, Dorjan Dyli, Matilda Hoxholli, Denada Todi, Flobenc Meçja.
Po ashtu mësohet se ka caktuar masën e sigurisë “arrest në shtëpi” dhe për ish-gjyqtaren Pajtime Fetahu, si dhe masën “arrest me burg për zëvendësdrejtorin e burgut të Bradasheshit, Maetin Musaj, i cili dyshohet se ka qenë pjesë e grupeve kriminale.
Ndërkohë mësohet se në kuadër të operacionit të SPAK është lëshuar “urdhër-arresti” dhe për shefin e krimeve në Durrës, Agostin Çinari. Më parë ai ka shërbyer në policinë e Pogradecit dhe të Elbasanit.
Përplasja mes grupit të “Sakatit” dhe “Tarzanit” që solli vrasjet në Elbasan
Franc Çopja, i njohur edhe si Franc Gergely, apo edhe me mbiemrin Bako u ekstraduar më 29 dhjetor të vitit të kaluar nga Dubai në Belgjikë, pasi akuzohet si porositësi i ezekutimit të Ardit (Arjan) Spahiu, kunati i Endrit dhe Erjon Alibejt. Krimi është regjistruar më 27 nëntor 2020 në Belgjikë, teksa si ekzekutorët akuzohen Florenc Meçe Alias Gega i arrestuar në Spanjë, si dhe Elvis Murati, i arrestuar në Gjermani.
Vrasja e Ardit Spahiut, ose siç njihej ndryshe si “Arjani i vogël”, dyshohet se është kryer për shkak të prishjes së pazareve të drogës.
Franc Çopja njihet si pjesë e grupit të ashtuquajtur me nofkën “Sakati”, ku bëjnë pjesë dhe dy vëllezërti e tij Hajdar Çopja dhe Ervin Bako alias Çopja. Grupi ka marrë atë emër për shkak se njëri prej vëllezërve është invalid. Pjesë e grupit është dhe Mikel Qosja (Kamami) ose siç thirret ndryshe “Keli i Kiçit”. Ata dyshohet se qëndrojnë në Dubai.
Grupi i “Sakatit” ka patur një përplasje të vazhdueshme me grupin e “Tarzanit”, njihet me këtë emër pasi “Tino” ka qenë nofka në Itali e Endrit Alibejt, i ezkekutuar në Bradashesh më 29 dhjetor 2018, bashkë me xhaxhain Arben Dylgjerin dhe turkun Erdal Durunai. Përplasja mes grupit duket se zuri qetësi pas arrestimit të Erjon Alibejt, vëllai i Endrit Alibejt, si dhe arrestimi i Nuredin Dumanit.
Dy vëllezërit Alibej dyshohet se drejtonin një grup të trafikut të drogës nga Holanda, si dhe për trafikim dhe shpërndarje lënde narkotike në veri dhe në qendër të Italisë. Por, përplasja mes dy grupeve nis që në Britaninë e Madhe. Aty, ku një sasi e madhe droge e zhdukur, 50 kg kokainë, do të sillte me kalimin e kohës viktima të shumta midis dy grupeve.
Endrit Alibej u ekzekutua në dhjetor të vitit 2018 në afërsi të Kombinatit Metalurgjik, në Bradashesh bashkë me turkun Erdal Durunay dhe Arben Dylgjeri. Kjo masakër, brenda një kohe të shkurtër prodhoi edhe 6 të vrarë të tjerë.
Ekzekutime, të cilat dhanë për grupin hetues edhe një panoramë më të qartë të asaj që po ndodhte në Elbasan, ku tashmë kishte një shpallje lufte të deklaruar midis dy grupeve rivale.
Një vit më vonë, po në muajin dhjetor, në vitin 2019, u ekzekutua një tjetër ‘rob’ i ‘Tarzanit’. Këtë herë ishte djali i hallës së Endrit Alibejt, Andi Zylyfi, i cili kishte pak kohë që ishte kthyer nga emigrimi. Edhe pse pa preçedentë penalë, Zylyfi u vra në fshatin Përparim në rrugën nacionale Elbasan-Peqin, teksa ndodhej në makinë me Ardit Uruçin, mikun e tij që fatmirësisht i shpëtoi këtij atentati.
Sapo kaluan shtatë muaj, erdhi një tjetër viktimë. Mesnatën e 1 korrikut, Klevi dhe Aldo Baho, vëllezër u qëlluan me breshëri plumbash dhe njëri prej tyre vdiq. Klevi mbeti i vrarë, ndërsa Aldo u plagos rëndë, por sot fatmirësisht jeton.
Më pas u ekzekutuan dhe Emiljano Ramazani, Regis Runaj dhe Bujar Çela, të cilat dyshohen si hakmarrje për vrasjet më lart dhe porositë i ka dhënë Erjon Alibej.
Erion Alibej, i ndodhur tashmë pas qelisë, vendosi të zbërthehet për prokurorët belgë të ardhur në Shqipëri, të gjithë mekanizmin e vrasjës së Ardit Spahiut. Ai akuzon për të gjitha të këqijat që po i ndodhnin familjes së tij, bandën e Çopjave, teksa Franc Bakon alias Çopjan e konsideronte si më të rrezikshmin mes tyre.
