Dallëndyshe Bici është shkakruar nga posti i drejtoreshës së Agjencisë Shtetërore të Kadastrës (ASHK), teksa kryeministri Edi Rama e ka emëruar në postin e drejtoreshës së Përgjithshme të Inspektoriatit Kombëtar të Mbrojtjes së Territorit (IKMT).
Në këtë post, Bici zëvendëson Ervin Hoxhën, i cili u emërua së fundmi në postin e Ministrit të Brendshëm. Për Dallëndyshe Bicin është një rikthim në detyrën si kryeinspektore e IKMT-së, pasi këtë post e ka mbajtur edhe më herët.
Gjithashtu, ajo më herët ka mbajtur dhe postin e zëvendësministres së Mbrojtjes, teksa në zgjedhjet parlamentare të vitit 2021 kandidoi për deputete në listën e Partisë Socialiste në Tiranë.
Pasi ish-zv.kryeministrit Arben Ahmetajt iu dogj mandati për shkak të arratisë, Dallëndyshe Bicit i erdhi radha për t’u futur në Kuvend për shkak se ishte e para nga votat preferenciale, por ajo e refuzoi mandatin e Ahmetajt. Para rrogës së deputetes, Bici preferoi më shumë të drejtonte Kadastrën, institucion i cilësuar si çerdhe korrupsioni, madje dhe nga vetë kryeministrit Edi Rama në daljet e tij publike. Tashmë ajo ikën nga Kadastra dhe rikthehet sërish në IKMT.
Ndërkohë, burime për mediat bëjnë me dije se në krye të Kadastrës është emëruar Lorena Goxhobelli, një grua pa një profil publik, por me lidhje të ngushta në oborrin e njerëzve të Edi Ramës.
Goxhebelli vjen nga Ministria e Mbrojtjes, ku shërbente si këshilltare e jashtme ligjore për pronësinë në kabinetin e ministrit që prej qershorit të vitit 2022. Gjatë viteve 2014 – 2017, ajo ka mbajtur postin e Këshilltares Ligjore të zëvendëskryeministrit dhe më pas Këshilltares Ligjore e Ministrit të Bujqësisë dhe Zhvillimit Rural, deri në maj të vitit 2022.
