Janë zbardhur detaje nga urdhër-arrestet e lëshuara nga SPAK mëngjesin e kësaj të hëne, ku në pranga u vunë kreu i Prokurorisë së Vlorës, Aurel Zarka, një ish-oficere e Krimeve të Rënda, Eriona Daupaj, avokati Radovan Çela dhe shtetasi A. V.
Burime bëjnë me dije se të katër shtetasit e mësipërm, duke përfshirë dhe prokurorin Aurel Zarka kanë qenë përdorues të aplikacionit të kriptuar “Sky ECC”, një aplikacion që është përdorur nga elementët e mafias dhe krimit.
Mësohet se operacion i SPAK është zhvilluar pas zbërthimit të bisedave mes shtetasve të mësipërm në “Sky ECC”, ku ka rezultuar se kanë abuzuar me detyrën.
Ndaj Aurel Zarkës rëndon akuza për veprën penale “Ushtrim ndikimi të paligjshëm ndaj personave që ushtrojnë funksione publike”.
Një prej të arrestuarve, shtetasi A.V. mësohet se është vëllai i një prej të akuzuarve për çështjen e “Toyota Yaris”, ku ishin fshehur 3.4 milionë euro brenda automjeteve që vinin nga Belgjika për në Portin e Durrësit.
Burime për mediat bëjnë me dije se arrestimet e sotme kanë lidhje dhe me pushimin e hetimit për këtë çështje. Për shkak të manovrave gjyqësore pesë të pandehurit që u akuzuan fillimisht për “Grup të strukturuar kriminal”, u akuzuan vetëm për “Mosdeklarim të të hollave në kufi”. Ervis Vladi, i akuzuari kryesor dhe i cilësuar si “koka” e trafikut të parave nuk u arrestua asnjëherë.
Gjithashtu, mësohet se agjentët e BKH-së kanë zbarkuar disa herë në ambientet e Prokurorisë së Vlorës gjatë këtij muaji dhe kanë marrë edhe disa dosje. Operacioni vijon dhe në rrjetën e SPAK pritet të bien edhe magjistratë e avokatë të tjerë.
Aurel Zarka më 9 maj të 2022 u emërua në krye të organit të akuzës në rrethin gjyqësor të Vlorës. Ndërkohë, rreth një muaj më parë, më 28 Qershor, Zarka u konfirmua në detyrë nga Komisioni i Pavarur i Kualifikimit, pasi kaloi shkallën e parë të vettiungut. Ai dha shpjegime të përmbledhura për dy gjetje në kriterin e pasurisë. Për pastërtinë e figurës dhe profesionalizmin Zarka u vlerësua pozitivisht.
Ndërkohë, Eriona Daupaj ka qenë oficere e Policisë Gjyqësore në ish-Prokurorinë e Krimeve të Rënda. Më pas ajo kaloi oficere e Policisë Gjyqësorë në Prokurorinë e Tiranës, ku fitoi edhe konkursin për në Shkollën e Magjistraturë, ku është aktualisht studente.
