Ka nisur Kongresi Zgjedhor i Partisë Socialiste, i cili po mbahet në Pallatin e Kongreseve.
Kongresi ka nisur me himnin kombëtar, teksa fjala hapëse është mbajtur nga një studente e akademisë politike të PS-së.
I fundit që ka mbërritur në sallë ka qenë kryeministri Edi Rama, i cili është pritur në hyrje nga Sekretari i Përgjithshëm i PS-së, Blendi Klosi, teksa me vete ka patur edhe një dosje.
Mbledhja do të jetë e ndarë në disa panele, ku do të miksohet puna e partisë dhe ajo e qeverisë së Edi Ramës.
Më konkretisht puna e Kongresit të PS-së do të jetë e ndarë në tre sesione, ku në pjesën e parë, atë të Mirëqeverisjes, ministrat do të parqesin arritjet e deritanishme, ku më shumë do të jenë fjalime për propagandë.
Ndërsa në pjesën e dytë, atë për Antikorrupsionin, pritet të flasin ministrja e Shtetit për Administratën, Adea Pirdeni dhe Fatmir Xhafaj, vëllai i trafikantit të drogës Geron Xhafaj, të cilit Edi Rama i ka besuar kryesimin e Komisionit Antikorrupsion, e cila është konsideruar nga opozita si një nismë për goditjen e institucioneve të drejtësisë.
Në pjesën e tretë do të jenë punët e brendshme të partisë. Sekretari i Përgjithshëm Blendi Klosi, ministrja për Parlamentin Spiropali dhe ministrja e Shtetit për Rininë dhe Fëmijët Bora Muzhaqi do të përqëndrohen tek nisma “Deputeti që duam”, rienergjizimi dhe anëtarësimet e reja në parti.
Më pas do të mbajë fjalimin kryesor numri një i socialistëve, kryeministri Edi Rama, i cili do të prezantojë platformën për përzgjedhjen e kandidatëve për deputet në zgjedhjet parlamentare të vitit 2025.
Me kodin e ri zgjedhor, partitë do të futen në garë me dy lista, 1/3 e kandidatëve do të jetë listë e mbyllur dhe 2/3 të tretat e kandidatëve do të jetë listë e hapur për çdo qark, ku edhe një votë më shumë preferenciale do të bëjë diferencën. Por, që të shkohet tek lista e hapur, fillimisht partitë do të duhet të marrin më shumë se 30% të votave në çdo qark.
Në zgjedhjet parlamentare të vitit 2021, kryeministri Rama la jashtë vijës së kuqe Fatmir Xhafajn, Mimi Kodhelin dhe Pandeli Majkon. Vetëm Xhafaj e theu herësin, 2 të tjerët hynë në Parlament pasi dorëzuan mandatin Najada Çomo dhe Alqi Bllako.
Gjithashtu, në Kongresin e sotëm do të votohet edhe Asamble e re e Partisë Socialiste, ku Edi Rama ka kërkuar që të jenë të rinj dhe të përjashtohen drejtorët që kanë poste në parti dhe administratë.
Asambleja e PS ka 350 anëtarë, por Kongresi do të zgjedhë vetëm 156 prej tyre, pasi anëtarët e tjera janë automatikisht për shkak të funksionit ( kryetarët Kuvendi, deputetë, ministra, kryetarë bashkish).
Mbetet për tu parë nëse kryeministri do të thotë emrin e pasueses së Lindita Nikollës, e cila dha dorëheqjen nga posti i kryetares së Kuvendit në seancën e fundit të sesionit parlamentar të këtij viti, për shkaqe të cilat i deklaroi “shëndetësore”.
Emri më i përfolur i momentit për të zëvendësuar Nikollën është ai i ministres së Shtetit për Marrëdhëniet me Parlamentin, Elisa Spiropalit.
Gjithashtu, mbetet të shihet nëse do të ketë ndryshime në Qeveri. Edi Rama jo pak herë ka surprizuar me emra anonimë, teksa ata që shkarkohen dhe emërohen e marrin vesh vetëm gjatë fjalimit të tij.
Rama do të bëjë ndryshime në Qeveri? Bajram Begaj shkon në zyrë në ditë pushimi
