Kreu i PD-së, Sali Berisha, gjatë fjalës së mbajtur në tubimin e sotëm, ka denoncuar shembjen e 13 pallateve nga Bashkia e Tiranës për interes të kompanisë “5D” për të ndërtuar aty.
Berisha tha se Erion Veliaj dhe Arbjan Mazniku i shembën 13 pallate në zemër të Tiranës vetëm për të mbushur arkat dhe kontot e veta dhe të kompanive të tij. Sipas tij, pallatet ishin vlerësuar të gjithë solidë dhe të parrënueshme nga tërmeti.
Sali Berisha: Para së gjithash sot unë duhet të përgëzoj me mirënjohje ata qindra protestuese e protestues që rrethuan bashkinë e Tiranës në një protestë të pamposhtur si dëshmitarë të vendosmërisë së tyre për të mos u pajtuar kurrë me vjedhjen e tmerrshme që Erion Veliaj iu ka bërë qytetarëve të Tiranës me djegësin. Me vjedhjen e tmerrshme që ai me drejtorët e tij ka bërë me modelin 100 përqind të kompanisë 5D. Më vjedhjen e tmerrshme që ky kryehajdut i shpifur ka bërë së bashku me Maznikun dhe hajdutët e tij, duke shembur 13 pallate në zemër të Tiranës vetëm e vetëm për të mbushur arkat dhe kontot e veta dhe të kompanive të tij. Pallate të vlerësuara që të gjitha solide, të parrënueshme nga tërmeti.
