Anëtari i Këshillit Bashkiak të Tiranës, mjeku Ilir Alimehmeti ishte këtë të mërkurë i ftuar në Euronews Albania ku e cilësoi si regres dakordësinë mes Partisë Demokratike dhe Partisë Socialiste për Reformën Zgjedhore.
Ai tha se ndërkohë që ishte ngritur pritshmëria për lista të hapura kjo gjë jo vetëm nuk u arrit, por sipas tij edhe potenciali zgjedhor i qytetarit u reduktua në krahasim me vitin 2021.
Alimehemeti tha se opozita duhet të bëhet më serioze me premtimet e saj e të mos ngrejë pritshmëri te qytetarët me premtime që nuk i mban, pasi kështu nuk do e ketë më të drejtën për tu folur qytetarëve në zgjedhjet e tjera.
“Ishte ngritur pritshmëria për lista të hapura për shkak të qëndrimeve dhe vendimeve të Gjykatës Kushtetuese, ishte ngritur pritshmëria për lista të hapura, për shkak të dëshirës së njerëzve për demokraci të drejtpërdrejtë. Kjo reformë është poshtë pritshmërive të njerëzve. Do analizojmë në rezultatin zgjedhor, sepse tashmë ky është fakt, zgjedhjet do vijnë e do analizohen, por nuk ka asnjë diskutim që potenciali zgjedhor i qytetarit është reduktuar.
Kemi një reduktim në formën e zgjedhjeve në krahasim me vitin 2021 ku zgjidhej subjekti por zgjidhej edhe partia edhe kandidatët, kishte një hapësirë. Ishte shumë pak, por në ne nuk mund ti përgjigjemi diçkaje të gabuar e diçka të ngjashme. Unë do thoja se do ishte e drejtë që njerëzve të mos ua ngremë pritshmëritë nëse nuk do i realizojmë më pas. Kjo është arsyeja se përse shumica dërmuese e qytetarëve nuk votojnë. Duhet të kthehemi në seriozitet e me këmbë në tokë. Të bëjmë premtime ku duhen te të mos ngremë pritshmëri të kota. Ndryshe nuk do kemi të drejtën morale tu flasim njerëzve herën tjetër”, – tha Alimhemeti.
