Janë zbardhur detaje të reja nga kontrolli që oficerët e BKH-së me urdhër të SPAK ushtruan në një apartament buzë lungomares në Vlorë, ku pretendohet se është në përdorim nga ish-ministri i Shëndetësisë Ilir Beqaj.
Apartamenti ndodhej në katin e 7-të të një pallati, teksa i është vendosur në derë shiriti “vendngjarje mos kalo”. Dera e apartamentit është hapur me shpërthim, pasi avokati i Beqajt nuk ka shkuar me pretendimin se ai apartament nuk është i ish-ministrit.
Gjithsesi, burime bëjnë me dije se nga kontrollet e mëparshme në banesat e Beqajt, në sendet e tij i janë gjetur disa foto me të njëjtin aredim që ka apartamenti në Vlorë aktualisht.
Gjithashtu, burime bëjnë me dije se oficerët e BKH-së kanë ushtruar kontrolle edhe në garazhet e pallatit të apartamentit në Vlorë në kërkim të një makine, por nuk kanë gjetur gjë.
Ndërkohë mësohet se dhe nga kontrolli i ushtruar në apartament nuk është gjetur asgjë e paligjshme, përveç disa shisheve me verë.
Kontrolli që nisi rreth orës 15:30 dhe përfundoi në mbrëmje është cilësuar si i paligjshëm nga avokati mbrojtës i Ilir Beqajt, Ermal Yzeiraj. Sipas tij SPAK ka ushtruar kontroll në një banesë jo në pronësi të Beqajt, por në të cilën ish-ministri ka jetuar duke lidhur një kontratë qiraje që ka përfunduar në vitin 2020.
“Sot më datë 24.07.2024, rreth orës 14:00, unë si avokat i z. Ilir Beqaj jam kontaktuar në telefon nga oficerët përkatës të SPAK, të cilët më kërkuan të isha prezent në kontrollin që do ti bëhej (sipas tyre) shtëpisë në pronësi të z. Ilir Beqaj në Vlorë, duke më kërkuar gjithashtu që tu sillja nga Tirana dhe çelësin e kësaj shtëpie pasi në rast të kundërt do të shpërthenin derën. Pasi e sqarova oficerin përkatës të SPAK që z. Ilir Beqaj nuk ka asnjë apartament në pronësi në Vlorë ai kërkoi ndjesë se ishte shprehur gabim dhe sqaroi që bëhet fjalë për një banesë që z. Beqaj nuk e ka në pronësi, por e ka patur me qira sipas një kontrate qiraje të vitit 2020. Përgjigja ime ishte që nëse bëhet fjalë për shtëpinë që z. Beqaj ka patur me qira dhe që e ka deklaruar dhe në ILDKPKI, kjo kontratë qiraje e 2020 ka kohë që nuk është më në fuqi dhe z. Ilir Beqaj ka kohë që nuk e përdor më këtë shtëpi me qira, prandaj unë si avokat nuk kisha përse të nisesha nga Tirana për në Vlorë për të marrë pjesë në kontrollin e një banesë që ishte në pronësi dhe në përdorim të dikujt tjetër dhe madje një kërkesë e tillë ishte dhe tërësisht e paligjshme. Z. Ilir Beqaj nuk është as qiramarrës dhe as posedues i këtij apartamenti. Madje nuk ka sens logjik që z. Beqaj të jetë përdorues i këtij apartamenti kur të gjithë e dinë që z. Ilir Beqaj është tashmë në ambientet e paraburgimit.” – deklaron avokati i Ilir Beqajt.
Ish-ministri i Ramës ndodhet në burg, pasi akuzohet për abuzim me fondet e Bashkimit Europian gjatë kohës që drejtonte agjencinë SASPAC.
Beqaj u arrestua në fillim të muajit korrik me urdhër të SPAK, pasi dyshohet se përmes njerëzve të besuar ka ndërtuar një skemë për të përfituar shuma të mëdha parash duke lëshuar fatura fiktive për shërbime të pakryera, të lëshuara nga biznese të ndryshme në Tiranë.
Gjithashtu, ai akuzohet edhe për fshehje pasurie, pasi dyshohet se është pronari “faktik” i restorantit “Gzona” tek Kalaja e Tiranës, si dhe i një automjeti që e ka në emër të bashkëpunëtorit të tij, po ashtu në burg, Ermal Kurtulaj.
Ilir Beqaj është nën hetim nga SPAK për “shpërdorim detyre” edhe në lidhje me koncesionin abuziv të sterilizimit, gjatë kohës që drejtonte Ministrinë e Shëndetësisë.
