Bashkia e Tiranës konsiderohet si një prej bashkive me administratën më të fryra në Eruopë, e duket se kryebashkiaku Erion Veliaj nuk ka të ndalur dhe as frikë prej drejtësisë.
Në mbledhjen e sotme të Këshillit Bashkiak, një prej vendimeve që u miratua pa asnjë lloj diskutimi, por vetëm me kartonat e “ushtarëve” të Veliajt ishte dhe shtimi i administratës së Bashkisë së Tiranës me 395 punonjës të rinj.
Në lidhje me këtë vendim ka reaguar këshilltarja e “Lëvizjes Bashkë”, Mirela Ruko, e cila thotë se sa herë që i afrohemi vitit elektoral, shohim bum punësimesh në administratën publike.
Sipas saj, rritja e stafit nuk lidhet domosdoshmërisht me rritjen e volumit dhe të cilësisë së shërbimit, për sa kohë që qytetarët vijojnë të ankohen për mungesë shërbimesh.
Ndërkohë, në dokumentin e miratuar nga Këshilli Bashkiak, vihet re se 6 punonjës i janë shtuar Kopshtit Zoologjik, i cili ka 68 punonjës në total, dyfishin e kafshëve a mos më shumë.
Reagimi i plotë i Mirela Rukos:
Ky është një nga vendimet që u mor sot (pa diskutim) në mbledhjen e Këshillit Bashkiak të Tiranës: 395 PUNONJËS TË RINJ do t’i shtohen Bashkisë së Tiranës dhe sipas Drejtoreshës së Burimeve Njerëzore në Bashki, kërkesat nga drejtoritë ishin më të larta.
Prej një viti, si anëtare e Këshillit Bashkiak, kam vërejtur se rritja e stafit nuk lidhet domosdoshmërisht me rritjen e volumit dhe të cilësisë së shërbimit, për sa kohë që qytetarët vijojnë të ankohen për mungesë shërbimesh.
Nga ana tjetër, sa herë që i afrohemi vitit elektoral, shohim bum punësimesh në administratën publike. A mos lidhet kjo me qëllime elektorale dhe me presionin që u bëhet punonjësve të administratës përgjatë fushatës, duke u kërkuar jo vetëm votën, por edhe të bëjnë vota për partinë në pushtet?!
Këtë nuk kam si e vërtetoj me dokumente, por logjika e shembujt e mëparshëm të çojnë këtu. Të lë shije të hidhur dhe është modeli më i mbrapshtë i politikëbërjes, përveçse e dënueshme me ligj.
