Maskra e mesnatës së kaluar në Memaliaj, me tre viktima dhe një të plagosur që tronditi vendin, teksa si në shumicën e rasteve, Policia e Shtetit mblodhi vetëm gëzhojat dhe makinën e djegur.
Në foton e mësipërme është pikërisht makina tip “BMW” ngjyrë e zezë duke u djegur në fshatin Bejaj të Mallakastrës, që dyshohet se kanë përdorur autorët në atentatin e Meliajt, ku shënjestër ishte Shyqyri (Shyqo) Kalemi.
Mësohet se brenda automjetit janë gjetur edhe armët e zjarrit të cilat dyshohet se janë përdorur në krim. Nga zjarri në makinë ka marrë flakë edhe nje ndërtesë aty afër.
Armët pritet t’i nënshtrohen analizave për të faktuar nëse janë përdorur ose jo në atentatin që shkaktoi 3 viktima dhe nëse ka gjurmë daktiloskopike të autorëve, që më pas mund të çojnë në identifikimin e vrasësve.
Autorët dyshohet se kanë qenë të paktën tre persona dhe kanë ardhur me makinën “BMW” nga qyteti i Memaliajt në drejtim të lokalit pranë bashkisë. Njëri prej tyre ka zbitur nga makina dhe ka qëlluar me breshëri kallashi drejt tavolinës ku ishin ulur Shyqyri dhe Artur Kalemi. Pas atentatit mafioz autorët janë larguar drejt Mallakastrës ku kanë djegur automjetin e përdorur në krim në fshatin Bejaj.
74-vjeçari Shyqyri (Shyqo) Kalemi, i cili ishte dhe shënjestra e atentatit, mbeti viktimë e masakrës së djeshme, ndërsa nga breshëria e plumbave mbeti i plagosur edhe vëllai i tij, Artur Kalemi 57 vjeç, i cili ishte ulur në të njëjtën tavolinë me viktimën.
Po ashtu u vra dhe 36-vjeçari Gledio Muka, i cili punonte si kamarier në lokal ka qenë pranë tavolinës së vëllezërve Kalemi në pjesën e jashtme të lokalit, pasi nuk iu ka shpëtuar plumbave nga breshëria e kallashnikovit.
Ndërsa, Marsel Çela ishte klient në lokal dhe ndodhej në pjesën e brendshme të lokalit, por u kap nga plumbat dhe për pasojë edhe ai humbi jetën.
Artur Kalemi, i cili mbeti i plagosur u dërgua me urgjencë në spital dhe mësohet se ndodhet në reanimacion në spitalin e Gjirokastrës dhe ka marrë dy plumba, një në kofshë dhe një në kraharor.
Shyqyri Kalemi është babai i Andrea alias Adriatik Kalemi dhe Zamir Kalemit të cilit iu kanë shpëtuar tre atentateve të mëparshme. Ndërsa Artur Kalemi është xhaxhai i tyre. Një prej pistave ku po heton Policia është hakmarrja ndaj Andrea (Adriatik) Kalemit.
