42-vjeçari Rigels Kaso, i cili u dhunua disa ditë më parë në Tiranë nga Bajram Gjeleshi, ka ndërruar jetë në spital pasi ndodhej në gjendje kome dhe në intubim.
Kaso u gjet i dhunuar brutalisht mëngjesin e 15 Korrikut në rrugën “Sokrat Miho”, në kryeqytet.
Sipas policisë, ai ishte dhunuar me grushte nga 34-vjeçari dhe i ka rënë koka në bordurë nga ku ka marrë dëmtime të shumta.
- Do takonte të dashurën, por u dhunua brutalisht – Si ndodhi ngjarja
42-vjeçari nga Bilishti ka komunikuar në Instagram me bashkëjetuesen e 34 vjeçarit, Bajram Gjeleshi. Ky i fundit i kishte lexuar bisedat dhe më pas i ka folur Rigels Kasos, nga adresa e partneres së tij, në emër të partneres, ku e ka ftuar për takim pranë pallatit ku jetonte në rrugën në rrugën “Sokrat Miho”.
Rigels Kaso ka shkuar me idenë se do takonte vajzën me të cilën po fliste në rrjetet sociale, por aty është përballur me partnerin e saj, Bajram Gjeleshi, i cili e ka goditur me sende të forta në kokë dhe trup.
42-vjeçari ndodhej prej ditësh në spitalin e Traumës dhe nuk ka mundur dot të japë versionin e tij të historisë.
- Autori ende në arrati
Autori është shpallur në kërkim dhe policia po punon për kapjen e tij. Ai akuzohet për veprën penale “Plagosja e rëndë me dashje”.
“Specialistët e Sektorit për Hetimin e Krimeve ndaj Personit kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, dhe po punojnë për kapjen e shtetasit B. Gj., 34 vjeç, lindur në Peshkopi dhe banues në Tiranë.
Shtetasi B. Gj., ditën e djeshme, më datë 15.07.2024, në rrugën “Sokrat Miho”, dyshohet se për motive të dobëta, ka goditur me sende të forta shtetasin R. K., 42 vjeç, banues në Bilisht, i cili ndodhet në spital, nën kujdesin e mjekëve.
Materialet i kaluan Prokurorisë për veprën penale “Plagosja e rëndë me dashje”, parashikuar nga neni 88 i Kodit Penal,” thuhej në njoftimin e policisë pak ditë më parë.
- Çfarë deklaronte fqinji i Rigels Kasos
Rigels Kaso, pas karrierës si futbollist dhe më pas si specialist futbolli në Bilisht, ishte kthyer profesionit të elektricistit. Prej kohësh merrej me instalime elektrike në rajonin e Korçës dhe kryesisht me kamerat e sigurisë.
Fqinji i 42-vjeçar deklaroi pak ditë më parë se nuk kanë pasur asnjëherë shqetësime nga ai, dhe se ishte një njeri që punonte dhe jetonte në Bilisht. Por prej dy tre ditësh nuk e kishin parë në zonë.
“Ai jetonte vetëm e ëma rrinte jashtë shtetit. Më parë ishte me gjyshen por pas vdekjes së saj jetonte vetë. Ai ishte specialist elektrik, punonte edhe punë private. Në Tiranë nuk di të punonte, por ishte njeri i shkëlqyer”, ka thënë ndër të tjera një prej fqinjëve të 42-vjeçarit.
