Valur rezulton tepër i fortë për Vllazninë, me islandezët të cilët triumfuan në Shkodër me rezultatin e thellë 0-4.
Ndryshe nga një javë më parë, ku Vllaznia tregoi personalitet dhe u ndëshkua vetëm në fund (2-2), në “Loro Boriçi”, shkodranët u shkërmoqën totalisht.
Sigurdsson zhbllokoi rezultatin në minutën e13-të, teksa Tryggvason dyfishoi pas tre minutash, ndërsa llogaritë e pjesës së parë i mbylli Pedersen me golin e minutës së 36-të.
Një goditje e fortë për skuadrën e Brdaric, që edhe pse provoi të reagonte e kishte të pamundur, e në krahun tjetër Valur realizoi edhe golin e katërt në minutën e 68-të me anë të Haraldsson.
Në fund 0-4 me Vllazninë që eliminohet kështu nga Liga e Konferencës pas rezultatit të përgjithshëm 2-6 ndaj Valur-it.
