Kryeministri Edi Rama zhvilloi këtë të mërkurë në Kryeministri një takim me kryetarët e Bashkive, ku në fokus të fjalimit të kreut të qeverisë ishin legalizimet dhe turizmi, teksa në takim nuk munguan as kryebashkiakët e opozitës.
Por, burime për mediat bëjnë me dije se në këtë takim nuk ka qenë i pranishëm kreu i Bashkisë së Tiranës, Erion Veliaj, i cili nga mosprania e tij nuk ka dëgjuar porositë dhe këshillat e shefit të tij.
Justifikimet për vizitat jashtë shtetit nuk qëndrojnë, pasi Veliaj ndodhet në Tiranë ku ka pritur ish-ambasadorin e SHBA-ve në Shqipëri, Alexander Arvizu dhe rreth orës 13:30 e ka dhënë “Çelësin e Qytetit”.
Nuk dihet nëse Veliaj nuk e ka patur një ftesë nga Rama, apo e ka refuzuar atë për shkak të takimit me Arvizun duke iu dukur më i rëndësishëm ky i fundit.
Kohët e fundit është folur për një përplasje të kryeministrit Edi Rama me Erion Veliajn, sidomos pas zbulimit të skandalit se drejtorët e bashkisë kishin krijuar kompaninë e tyre “5D” për të marrë lekët e taksapaguesve të Tiranës përmes tenderave.
Gjatë kësaj kohe, Rama është munduar ta shmangë Erion Veliajn edhe nga fotot e publikuara në rrjetet sociale.
