Sekretari i Përgjithshëm i PD-së, Flamur Noka është prononcuar për mediat nga oborri i selisë blu, pas mbylljes së protestës së sotme kombëtare të opozitës para Kryeministrisë.
Noka tha se sot shumica e shqiptarëve foli, teksa u shpreh i bindur në arritjet e qëllimeve për qeverinë teknike dhe lirimin e kreut të PD-së Sali Berisha.
Ai tha se regjimi i narkos duhet të dëgjojë zërin e qytetarëve, teksa sipas Nokës, sot PD-ja është më e bashkuar dhe më e fortë.
“Falënderoj qindra dhe mijëra qytetarë, opozitarë dhe kundërshtarët të këtij regjimi që morën pjesë në këtë protestë madhështore. Të gjithë ata që protestuan treguan se shqiptarët e lirë nuk nënshtrohen. Sot u protestua nga qindra mijëra shqiptarë kundër narkoregjimit.
Mesazhi i cdo qytetari ishte që Shqipëria kërkon demokraci dhe Shqipëria nuk mund të pranojë që të këtë liderin e opozitës të burgosur politik, Shqipëria nuk mund të jetë i vetmi vend që zgjedhjet vidhen
Mesazhi ishte që Shqipëria nuk mund të jetë i vetmi vend i Europës pa zgjedhje të ndershme e të lira. Regjimi i narkos duhet të dëgjojë zërin e qytetarëve, sot foli shumica e shqiptarëve
Jemi të vendosur në betejën tonë nuk ka kthim prapa, lirimi i liderit të opozitës dhe qeveria teknike për paqe sociale. Siç arritëm çdo qëllim, do të arrijmë edhe fitoren në këtë betejë. Kemi treguar se do të luftojmë dhe do të fitojmë. Opozita është në këmbë, ka qenë dhe do të jetë. Sot Shqipëria ka një PD më të bashkuar dhe më të fuqishme dhe më të bashkuar se kurrë. Kjo protestë këtë demonstroi.” – tha Noka.
