Rreth orës 20:30 ka nisur protesta kombëtare e thirrur nga opozita para godinës së Kryeministrisë, teksa shumica e demokratëve kanë marshuar nga selia e PD-së.
Veç protestimit kundër skandaleve të Qeverisë, protestuesit do të kërkojnë dhe lirimin e liderit demokrat Sali Berisha, duke pretenduar se mbahet nën masën e “arrestit në shtëpi” pa prova. Po ashtu ata kërkojnë edhe qeveri teknike para zgjedhjeve, pasi sipas tyre, me kryeministrin Edi Rama nuk ka zgjedhje të lira dhe të ndershme.
Protesta ka nisur me këndimin e himnit kombëtar, teksa më pas fjalën e ka marrë regjisori Edmond Budina. Pas tij janë planifikuar të mbajnë fjalim dhe Artemisa Zenuni, Erion Dasho, Artemisa Halili si dhe dy liderët e opozitës, Ilir Meta dhe Sali Berisha.
Gjithashtu, protestuesit mbajnë në duar edhe pankarta ku evidentojnë skandalet e kësaj qeverie, duke nisur me “narko-shtetin”, e pretenduar prej tyre.
