Partia Demokratike e Kosovës dhe Aleanca për Ardhmërinë e Kosovës kanë kritikuar qeverinë për dështimin e ndërtimit të termocentralit të ri e si pasojë, pas procesit të arbitrazhit, Kosova detyrohet t’i paguajë kompanisë amerikane “Contour Global” mbi 21 milionë euro.
Në fund të vitit 2017, Qeveria e Kosovës e pati nënshkruar marrëveshjen për ndërtimin e termocentralit “Kosova e Re” me kapacitet 500 megavat, i cili do të kushtonte 1,3 miliardë euro. Ndërtimi ishte parashikuar të fillonte në vitin 2020, ndërsa të vihej në punë në vitin 2023.
Mirëpo në vitin kur duhej të niste ndërtimi, në pushtet erdhi Lëvizja Vetëvendosje dhe Lidhja Demokratike e Kosovës, të cilat ishin kundër këtij projekti. Në mars të vitit 2020, “Contour Global” njoftoi zyrtarisht tërheqjen nga projekti i “Kosovës së Re” për arsye të ndryshimeve politike në Kosovë, por edhe se kompania kishte hequr dorë nga projektet me thëngjill.
Partia Demokratike tha se vendimi për t’i paguar dëmshpërblimin kompanisë amerikane ka qenë i qëllimshëm dhe i shkakton dëm buxhetit dhe ekonomisë së vendit.
Në të njëjtën kohë akuzuan qeverinë se ka dështuar të ndërtojë e të sigurojë kapacitete të reja energjetike.
Bernard Nikaj, nga Partia Demokratike e Kosovës, u shpreh: “Përtej humbjes financiare, menaxhimi i munguar dhe i dështuar i projektit të termocentralit me kompaninë “Contour Global” edhe një herë ka shpërfaqur mungesën totale të aftësisë të qeverisjes së kësaj qeverie që mbi të gjitha të ndërtojë një vizion të qartë dhe të qëndrueshëm për adresimin e nevojave të qytetarëve të Kosovës për furnizim me energji”.
Ndërsa për ish-kryeministrin Ramush Haradinaj, me këtë vendim, Kurti dëshiron të mbajë Kosovën të varur për import të energjisë me “GEN”-in, një kompani serbe për të cilin ambasadori Martin Berishaj ishte i dyshuar si i përfshirë.
Ramush Haradinaj, nga Aleanca për Ardhmërinë e Kosovës, theksoi: “Kurti dhe e gjithë klika e tij që kanë dështuar “Contour Global” janë kriminelë sepse e kanë dështuar një termocentral 500 megavat të ri dhe ne ende sot furnizohemi prej termocentraleve që janë mbi gjysmë shekulli të vjetra, që më shumë prodhojnë helm se energji fatkeqësisht dhe jo vetëm kaq, por vazhdojnë duke blerë energji”.
Për Qeverinë e Kosovës projekti i termocentralit të ri as ka qenë i ideuar të realizohet e as ka qenë në përmbajtje i dobishëm për vendin.
