Kampionati europian “Gjermani EURO 2024” po shkon drejt fundit, teksa të martë dhe të mërkurë do të luhen dy sfidat gjysmë-finale, ajo mes Spanjës dhe Francës, si dhe ajo me Anglisë dhe Holandës.
Me pritjen për të zbuluar kombëtaret që do të përballen në finalen e së dielës së 14 korrikut në “Olympiastadion” të Berlinit, po rritet edhe kurioziteti për të zbuluar se kush do ta arbitrojë në atë ndeshje.
Një zgjedhje, ajo që i është besuar Roberto Rosetti-t, kreu i arbitrave në UEFA. Vendimi pritet të jetë disi i vështirë për Rosetti-n që duhet të zgjedh mes tre gjyqtarëve, pasi nga polemikat pas arbitrimit kontrovers të Anthony Taylor në Gjermani-Spanjë, emri i tij është skualifikuar automatikisht.
Gara do të jetë mes Michael Oliver, Szymon Marciniak dhe Daniele Orsato. Shumë do të varet nga rezultatet e gjysmëfinaleve, nëse Anglia e Gareth Southgate do të mundte Holandën e Ronald Koeman dhe do të arrinte në finale, Oliver do të përjashtohej automatikisht, duke qenë se është anglez.
Marciniak, megjithatë, mund të penalizohet nga disa gabime të së kaluarës dhe nga preferencat e tij të njohura politike të së djathtës ekstreme.
Italiani Daniele Orsato duket të jetë favorit për të arbitruar finalen, për të përfunduar dhe karrierën e tij në mënyrën më të mirë të mundshme, teksa do të shtojë edhe pak Itali në qiellin e Berlinit.
