Të premten e 5 korrikut nis edhe faza më e nxehtë e Kampionati Europian të futbollit, me sfidën Spanjë-Gjermanisë, që do të çelë siparin e çerekfinaleve.
Mirëpo sfida mes skuadrave më të titulluara në “Kontinentin e Vjetër”, nuk do të jetë e vetmja që do të dhurojë spektakël atë ditë.
Në orën 21:00, në stadiumin e Hamburgut do të luhet një tjetër “klasike” evropiane, me Francën, që përballë tyre do të kenë Portugalinë, në një përsëritje të asaj finaleje të madhe, të Euro 2016.
Mirëpo kjo përballje nuk duhet të shihet vetëm nga ky aspekt, por edhe përballja mes Kylian Mbappe dhe idhullit të tij, Cristiano Ronaldo.
Sulmuesi i “Gjelave” nuk e ka fshehur kurrë admirimin e tij për portugezin, 5 herë fitues të Topit të Artë, ndërsa në një rrëfim para sfidës çerekfinale, thekson se e respekton “luzitanin”, si një legjendë të futbollit, por në fushë do të tentojë të fitojë për Francën.
“Të gjithë e dinë admirimin që kam për Cristianon. Kam pasur mundësinë të takohem dhe bisedoj me të shumë herë. Jemi në kontakt dhe ai gjithmonë përpiqet të më japë këshilla të mira. Është një nder.
Pavarësisht se çfarë do të ndodhë, ai do të mbetet një legjendë e futbollit. Por shpresoj që të avancojmë nesër.
“Unë thjesht dua të admiroj madhështinë e Cristianos. Nuk do të vijë më futbollist tjetër si ai. Ai ka lënë gjurmë në historinë e futbollit.”- u shpreh Mbappe.
