Janë zbardhur detaje të reja nga shpërthimi me tritol i regjistruar në orët e para të mëngjesit të sotëm në Shkodër, në derën e banesës së efektivit të Policisë, Vilson Zhuri.
Mësohet se familja Zhuri ndodhej në banesë në gjumë, në momentin kur ka shpërthyer tritoli dhe janë zgjuar menjëherë sapo kanë dëgjuar zhurmën. Si pasojë e shpërthimit ka patur vetëm dëme materiale.
Ngjarja ndodhi rreth orës 3:10 të mëngjesit në lagjen “Tepe”. Banesa e efektivit të Policisë ishte me kamera sigurie, të cilat kanë filmuar momentin e vendosjes së tritolit.
Nga kqyrja që u kanë bërë autoritet, autorët kanë qenë dy persona me motor dhe me skafandëra në kokë të cilët vendosin tritolin dhe më pas largohen me shpejtësi në drejtim të paditur duke mos lënë gjurmë.
Efketivi Vilson Zhuri prej dy vitesh është me detyrë oficer krimesh në njësinë administrative Pult të Dukagjinit. Ai ka deklaruar se nuk ka konflikte personale, por dyshon se ngjarja mund të ketë ndodhur për shkak të detyrës.
Sipas burimeve policore sulmi me tritol ndaj Vilson Zhurit mund të ketë lidhje me parcelat e drogës në zonën e Dukagjinit, pasi njësia e Pultit, është një prej zonave ku kultivohet më shumë kanabis.
Grupi hetimor nën drejtimin e Prokurorisë vijon veprimet për sigurimin e provave me qëllim identifikimin dhe kapjen e autorit/ve.
