Gjykata e Apelit te Juridiksionit të Përgjithshëm dënoi sot me 7 vite burg Arbër Paplekaj, i cili në 21 prill të vitit 2021 vrau në Elbasan Pjerin Xhuvanin. Gjykata ndryshoi akuzën nga ‘vrasje në rrethana cilësuese’ në “vrasje në kushtet e tronditjes psikike”.
Edhe pse vrasja ndodhi në sytë e 6 oficerëve dhe dy zëvendësdrejtorëve të policisë së Elbasanit Albert Nushi dhe Nikollaq Palla, dhe këta të funduit nuk morën asnjë masë për parandalimin e krimit, Gjykata e Apelit vendosi që të pushojë çështjen ndaj tyre dhe t’i shpallë të pafajshëm.
Vendimi i sotëm, zbuti disa nga vendimet e gjykatës së Elbasanit, e cila kishte dënuar me 22 vite burg Paplekajn dhe dy ish-zëvendësdrejtorët e Policisë së Elbasanit, Albert Nushi dhe Nikollaq Palla për të cilët kishte dhënë nga 1 vit shërbim prove për secilin.
Si u amnistua ‘zari’ i trafikantit të kokainës Geron Xhafaj?
Duket se ky vendimi i sotëm i Gjykatës së Apelit është më shumë politik, sesa gjyqësor, pasi dihet lidhjet e Albert Nushit me trafikantin e drogës Geron (Agron) Xhafaj.
Albert Nushi u arrestua me urdhër të Prokurorisë së Elbasanit në 21 qershor 2022, për akuzat e “shpërdorimit të detyrës” dhe “deklarim të rremë”, pas përplasjes me armë gjatë fushatës elektorale të vitit 2021 në Elbasan, ku mbeti i vrarë Pjerin Xhuvani.
Më qartë, Nushi, i cili në atë kohë ishte numri dy i Policisë së Elbasanit, akuzohej për “manipulim provash”.
Albert Nushi manipuloi provat në çështjen “Geron Xhafaj”
Ai është një prej personave përgjegjës për manipulimin e provave në çështjen “Geron Xhafaj”, për të cilin u ngritën dyshime se vijonte trafikun e narkotikëve, ndërkohë që ishte i dënuar në Itali dhe vijonte lëvizjen lirshëm në Shqipëri.
Një audio-regjistrim i bërë publik në pranverën e vitit 2018 tregonte se Agron (Geron) Xhafaj, bisedonte me një person tjetër për trafik narkotikësh nga Vlora drejt Italisë.
Ky regjistrim ishte një goditje e fortë për vëllain e trafikantit, Fatmir Xhafaj, i cili mbante pozicionin e Ministrit të Brendshëm në qeverinë “Rama 2”.
Ndaj, duhej bërë gjithçka që regjistrimi dhe të gjithë provat e tjera të manipuloheshin dhe trafikanti Agron (Geron) Xhafaj të dilte i pastër.
Këtë “detyrë partiake” e mori përsipër Albert Nushi, i cili, në pozicionin e drejtorit të Policisë së Fierit në atë kohë, manipuloi në mënyrë të trashë dëshmitarin e rremë, Fredi Alizoti, për të rrëzuar bisedën e regjistruar ndërmjet Agron (Geron) Xhafaj dhe një personi tjetër, Albert Veliu.
Të dhënat e dosjes hetimore të ish-Prokurorisë për Krime të Rënda, e cila ndoqi rastin “Geron”, e tregojnë drejtuesin e lartë policor, Albert Nushi, në rolin e një “zari” përballë kriminelit Fredi Alizoti.
Por duket se me vendimin e sotëm, Gjykata e Apelit ka vendosur që të falë ‘zarin’ e trafikantit të drogës Agron (Geron) Xhafaj, pasi edhe pse Albert Nushi ishte prezent në krimin e rëndë dhe së bashku me 6 efektivët e tjerë të policisë dhe zv.drejtorin tjetër Nikollaq Palla, nuk bënë asgjë për të shmangur konfliktin e armatosur.
Lexo edhe:
Albert Nushi/ “Zari” i Geron Xhafaj arrestohet për manipulim provash
