Një sulm drejt një pjesëtar të Xhandarmërisë, i cili ishte në shërbimin e sigurisë në Ambasadën e Izraelit është regjistruar paraditen e kësaj të shtune në Beograd.
Ministria e Brendshme e Serbisë tha se rreth orës 11:00, një person i panjohur, ” identiteti i të cilit po përcaktohet, qëlloi me hark me shigjeta një anëtar të Xhandarmërisë i cili po ruante Ambasadën e Izraelit, duke e goditur në qafë”.
Në njoftim u tha se pjesëtari i Xhandarmërisë Millosh Jevremoviç, 34-vjeç, ka përdorur armën në vetëmbrojtje, duke qëlluar sulmuesin, i cili vdiq si pasojë e plagëve të marra.
Ministria e Brendshme e Serbisë tha se polici i plagosur është transportuar në Qendrën Emergjente, ku do t’i nënshtrohet një operimi për të hequr shigjetën nga qafa.
Mjeku i Qendrës Emergjente ka deklaruar se pacienti është në rrezik jeta dhe operacioni është në zhvillim e sipër.
Zëvendëskryeministri serb, njëherësh ministri i Punëve të Brendshme, Ivica Daçiç ka deklaruar se ky rast po trajtohet si akt terrorist.
“Mjekët thonë se mund t’i ketë shpëtuar jetën që nuk e ka nxjerrë shigjetën, ka arritur të mbrohet në këtë gjendje, ka qëlluar sulmuesin, menduam se sulmuesi do të mbijetonte për të mësuar më shumë. Ai kishte edhe një thikë. Përfundimi është se bëhet fjalë për një sulm terrorist ku janë përfshirë persona të lidhur me lëvizjen vehabiste. Zyra e Prokurorit Special ka marrë përsipër këtë rast. Të gjitha rrethanat e sulmit dhe motivet e mundshme po hetohen”, tha Daçiç për gazetarët, teksa vizitoi në Qendrën e Emergjencës policin e plagosur.
Serbia ka mbajtur raporte të ngushta me Izraelin, shtet që po vazhdon operacionet ushtarake në Gazë, kundër Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.
