I është dhënë lamtumira e fundit këtë të mërkurë biznesmenit sarandiot, Armand Nelaj, 52-vjeç, i cili humbi jetën në rrethana misterioze pas një shpërthimi mbrëmjen e të hënës, teksa ndodhej në det rreth 100 metra larg Portit të Sarandës.
Shpërthimi u regjistrua rreth orës 22:00, kur e gjithë vëmendja ishte tek ndeshja Shqipëri-Spanjë, teksa fillimisht u raportua për shpërthimin e një bombole oksigjeni. Burime pranë grupit hetimor bëjnë me dije se tashmë kjo pistë ka rënë tërësisht dhe dyshohet se biznesmeni mund të jetë vrarë nga një atentat me tritol.
Trupin e viktimës e nxorrën nga deti në breg dy turistë të huaj, që deri më tani mendohet se gjendeshin aty rastësisht. Ata kanë deklaruar në polici se po lëviznin me gomone drejt skafit të ankoruar në radë kur kane parë trupin e pajetë dhe e kanë transportuar deri në port.
Fillimisht viktima ishte i paidentifikuar, teksa ditën e djeshme ka qenë i vëllai, i cili e ka njohur nga tatuazhi në qafë.
Policia po heton se Armand Nelajt mund t’i jetë bërë atentat për shkak të konflikteve të fundit apo konkurencës në biznes. Në dëshminë e dhënë për grupin hetimor, familjarët e 52-vjeçarit kanë deklaruar se nuk kishin dijeni për konflikte dhe as nuk e dinin vendndodhjen e tij mbrëmjen e së hënës.
Grupi hetimor ka mbledhur disa pjesë metalike në vendin e shpërthimit, të cilat janë dërguar në Laboratorin e Policisë Shkencore për t’u ekzaminuar, rezultatet e të cilit do të përcaktojnë në mënyrë të saktë se nga çfarë është shkaktuar shpërthimi. Gjithashtu, mësohet se janë sekuestruar disa kamera sigurie në rrugët e qytetit afër portit për të parë levizjet e viktimës dhe atentatorëve.
Armandi Nelaj, biznesmen prej 13 vitesh, zotëronte kompaninë e mjeteve të ndërtimit “Grand Konstruksion” dhe nuk rezulton i skeduar apo dënuar më parë. Gjithsesi emri i tij është përmendur para 4 vitesh në një emision investigativ, ku thuhej se 52-vjecari ka tentuar të përfitojë pronë publike, lulishte, me dokumente false. Biznesmeni nuk arriti asokohe të merrte pronen e pretenduar, ndaj sot lulishja është prone e shtetit.
