Policia e Tiranës ka vënë nën hetim një person, i cili përmes një veprimi t pazakontë ka dëmtuar fshirëset e xhamave të 30 automjeteve, në disa zona të Tiranës.
Blutë e kryeqytetit bëjnë me dije se kanë proceduar penalisht në gjendje të lirë shtetasi A. Xh., 62 vjeç, banues në Tiranë. Ky i fundit dyshohet se vuan nga probleme të shëndetit mendor.
“Shërbimet e Komisariatit të Policisë Nr. 3, pas kallëzimeve të depozituara nga disa shtetas, për një person që iu kishte dëmtuar fshirëset e xhamave të automjeteve, pasi kanë identifikuar autorin e dyshuar, e kanë shoqëruar atë në komisariat për sqarimin e rrethanave dhe kryerjen e veprimeve të mëtejshme procedurale.
Në vijim të veprimeve u referuan materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, dhe u procedua në gjendje të lirë shtetasi A. Xh., 62 vjeç, banues në Tiranë, i cili dyshohet se vuan nga probleme të shëndetit mendor.” – thuhet në njoftimin e Policisë.
Materialet i kaluan Prokurorisë për veprën penale “Shkatërrimi i pronës”.
