Mina, Arabia Saudite – Në temperatura të larta, pelegrinët myslimanë në qytetin saudit të Mekës u mblodhën në një kamp të madh çadrash në shkretëtirë të premten, duke filluar zyrtarisht pelegrinazhin vjetor të Haxhit. Më parë, ata rrethuan Qaben në formë kubi në Xhaminë e Madhe, vendi më i shenjtë i Islamit.
Më shumë se 1.5 milionë haxhinj nga e gjithë bota janë mbledhur tashmë brenda në Mekë dhe rreth e rrotull saj për Haxh, dhe numri ishte ende në rritje kur më shumë pelegrinë nga brenda Arabisë Saudite u bashkuan me ta. Autoritetet prisnin që numri të kalonte 2 milionë këtë vit.
Haxhi i këtij viti vjen në sfondin e luftës së furishme Izrael-Hamas në Rripin e Gazës, e cila e shtyu Lindjen e Mesme në buzë të një konflikti më të gjerë.
Palestinezët në Gaza nuk ishin në gjendje të shkonin në Mekë këtë vit për shkak të mbylljes së vendkalimit në Rafah në maj, kur Izraeli zgjeroi ofensivën e tij tokësore në qytetin jugor të Rafahut, në kufi me Egjiptin.
“Ne lutemi për myslimanët, për vendin dhe popullin tonë, për të gjithë botën myslimane, veçanërisht për popullin palestinez,” tha Mohammed Rafeeq, një pelegrin indian, teksa po shkonte në kampin e tendave në Mina.
Autoritetet saudite me sa duket kanë qenë të shqetësuara për protestat apo thirrjet e mundshme kundër luftës gjatë pelegrinazhit të Haxhit. Ata thanë se nuk do të tolerojnë politizimin e pelegrinazhit.
“Mbretëria me vendosmëri konfirmon se nuk do të lejojë asnjë përpjekje për t’i kthyer vendet e shenjta (në Mekë) në një arenë për të lëshuar thirrje,” tha kolonel Talal Al-Shalhoub, një zëdhënës i Ministrisë së Brendshme, në një konferencë shtypi të premten. “Mbrojtja dhe siguria e mysafirëve të Rahmanit është një vijë e kuqe.”
Zyrtarët ndihmuanë 4200 pelegrinët nga Bregu Perëndimor i pushtuar të shkonin në Haxh. Autoritetet saudite thanë se 1000 të tjerë nga familjet e palestinezëve të vrarë ose të plagosur në Gaza kanë mbërritur gjithashtu, me ftesë të mbretit saudit Salman. Të ftuarit kishin dalë nga Gaza – kryesisht në Egjipt – përpara se të mbyllej vendkalimi kufitar në Rafah.
Ibrahim Abu Shaaban me gruan e tij në çadrën e tyre të enjten, 13 qershor 2024 në Deir al Balah, Rripi i Gazës.
Dy pelegrinë të verbër kryejnë Haxhin me ndihmën e udhërrëfyesit të tyre jashtë Xhamisë së Madhe në Mekë, Arabi Saudite, të enjten, 13 qershor 2024.
