Presidenti i Turqisë, Recep Tayyip Erdogan zhvilloi sot një vizitë zyrtare në Tiranë, ku u prit nga homologu i tij shqiptar Bajram Begaj, takoi kryeministrin Edi Rama si dhe u nënshkruan një sërë marrëveshjesh mes dy Qeverive.
Në përfundim të vizitës së tij, Erdogan dhe Rama, në praninë e mijëra qytetarëve, inaguruan xhaminë e Namazgjasë në Tiranë, e cila prej 5 vitesh pas përfundimit të ndërtimit të saj, i mbante dyert e mbyllura.
Në ceremoninë e inagurimit mungoi kreu i Komunitetit Mysliman të Shqipërisë, Bujar Spahia, arsyet të cilat nuk janë bërë publike nga KMSH, por lihet të kuptohet për shkak se ai konsiderohet nga Erdogan si një njeri i Fethullah Gülen, të cilën presidenti turk e konsideron si organizatë terroriste dhe institucionin e KMSH-së si të kapur nga “FETO”.
Edhe gjatë konferencës së sotme të përbashkët me Ramën, Erdogan e ripërsëriti kërkesën e tij drejtuar Tiranës zyrtare për të luftuar organizatën terroriste “FETO”, siç e konsideron ai.
Ndërkohë, KMSH u përfaqësua në ceremoninë e inagurimit të xhamisë së Namazgjasë nga Myftiu i Tiranës, Gazment Teqja, i cili do të jetë gjithashtu edhe kreu i bordit të fondacionit të përbashkët, mes KMSH dhe palës tjetër, që do të administrojë Xhaminë e Namazgjasë më tej.
Një tjetër personazh që mungoi në ceremoninë e inagurimit të xhamisë së Namazgjasë ishte dhe kreu i Bashkisë së Tiranës, Erion Veliaj.
Njeriu që nuk lë rast pa e shfrytëzuar për propagandë, sot pothuajse është zhdukur fare, madje duke mos bërë as edhe një postim në rrjetet sociale, për inagurimin e xhamisë më të madhe në Ballkan, një projekt i finalizuar si marrëveshje që në kohën e Partisë Demokratike në pushtet.
Në ceremoninë e inagurimit ishin të gjithë ministrat e Qeverisë, madje edhe Bora Muzhaqi, si dhe bashkëshortja e kryeministrit Edi Rama, Linda Rama, ndërkohë që aty mungonte numri 1 i kryeqytetit, Erion Veliaj.
Vlen të theksohet fakti se xhamia e Namazgjasë nuk do të jetë thjeshtë një vendfalje, por një kompleks multifunksional që do t’u shërbejë edhe qytetarëve të tjerë, sikurse edhe turistëve.
Në një vepër kaq të rëndësishme për turizmin e Tiranës, në ceremoninë e inagurimit të saj mungoi Erion Veliaj, njeriu që “mburret” në rrjet edhe me semaforët apo shkrimet në tabela, për të mbuluar skandalet me mbytjen nga plehrat, mungesa e ujit të pijshmën, zënia e frymës së Tiranës me kulla, etj.
Deri më tani, nuk ka patur asnjë reagim nga Bashkia e Tiranës për arsyet e mungesës së Erion Veliajt në ceremoninë e inagurimit të xhamisë së Namazgjasë.
Vlen të theksohet fakti se mes komunitet mysliman dhe Erion Veliajt ka patur përplasje të theksuara kohët e fundit, sidomos pas martesës së paligjshme homoseksuale në tarracën e Bashkisë së Tiranës.
Për këtë ngjarje, ka patur edhe padi në SPAK ndaj Erion Veliajt për “shpërdorim detyre”, jo nga KMSH, por nga grupe të myslimanëve që pretendohet se do të menaxhojnë dhe xhaminë e Namazgjasë./Boldnews
