Protestat e blegtorëve duket se nuk kanë dhënë asnjë efekt, pasi monopili i grumbulluesve për çmimin e qumështit vazhdon.
Sipas blegtorëve, qumështi i lopës nga fermat e mëdha dhe të mesme po grumbullohet me çmim 65 deri në 67 lekë për litër nga 78 lekë që ishte më parë. Ndërsa nga fermat e vogla, qumështi po grumbullohet me çmim 60 lekë.
Blegtorët e fermave të vogla kanë pohuar për Monitor se nga muaji qershor janë lajmëruar nga grumbulluesit se qumështi i lopës do t’u blihet me 55 lekë për litër apo 15% më pak sesa shitet. Rënie e çmimit është lajmëruar edhe për qumështin e deles, nga 120 lekë për litër që shitet aktualisht, çmimi pritet të bjerë në 100 lekë për litër apo 16% më pak.
Në lidhje me këtë situatë ka ardhur një reagim nga ish-Sekretari i Ministrisë së Bujqësisë, Vojo Bregu, i cili sjell në vëmendje takimet e ministrisë së Bujqësisë, Anila Denaj për të “shuar” protestat e blegtorëve. Sipas tij, Anila Denaj u ka premtuar blegtorëve pas takimit të datës 9 Prill se për dy muaj duhet ti jepnin kohë përpunuesve të qumështit për përgatitjen e kontratave dhe për një “respekt financiar” mes palëve.
Vojo Bregu shkruan se në këto dy muaj grumbulluesit po marrin qumështin dhe duke i “respektuar” blegtorët nuk po i japin lekët e djersës së tyre, teksa tashmë do ua ulin çmimin sërish edhe me 15%.
Ai deklaron më tej se e vetmja mënyrë që as qeveria, as përpunuesit të mos guxojnë të tallen me blegtorët, është që këta të fundit të marrin traktorët, t’i mbushin me bajga dhe naftë vetëm për vajtje në Tiranë dhe t’i fikin traktorët po aty, para Kryeministrisë
Reagimi i plotë i Vojo Bregut:
Para 2 muajsh blegtorët bënë një paradë me traktora në autostradën Tiranë Lushnjë, duke protestuar për çmimin që blihej qumështi nga prodhuesit. Blegtorët i premtuan Taulant Ballës që nuk do të bënin protestë por thjesht një paradë, pasi ky i fundit do të nderhynte tek ministria e Bujqësisë për rritjen e çmimit të qumështit. Znj. Denaj bëri një takim me blegtorët dhe përpunuesit e qumështit. Deklarata e ministres pas takimit në datë 9 Prill, ishte se për 2 muaj duhet ti jepnin kohë përpunuesve të qumështit për përgatitjen e kontratave dhe për një “respekt financiar” mes palëve.
Çfarë ndodhi për 2 muaj?
Ka 2 muaj që përpunuesit e qumështit në shumicë e tyre, po marrin qumështin dhe duke i “respektuar” blegtorët nuk po i japin lekët e djersës së tyre. Por nga informacionet “respekti financiar” do vazhdojë më tej, duke ulur për muajt në vazhdim me 15-20% çmimin e blerjes së qumështit.
Ky është respekt, jo shaka.
E kam thënë para 2 muajsh. E vetmja mënyrë që as qeveria, as përpunuesit të mos guxojnë të tallen me ta, është të marrin traktorët, ti mbushin me bajga dhe naftë vetëm për vajtje në Tiranë, ti hedhin bajgat aty ku i takojnë, dhe ti fikin traktorët po aty, para kryeministrisë dmth. Atëherë do të shikojnë që do respektohen vërtet.
P.S. këto fjalitë e fundit i shkruajta kot se e di që nuk ndodh. I krahasova blegtorët tanë me ata francezë për shpirtin e protestës.
