Nga Boldnews.al
Policia e Shtetit është përfshirë nga “ethet” e një VKM-je të pritshme që do të rregullojë gradat, çka përkthehet me rrogë dhe pozicion pune më të mirë.
Prej disa javësh, në disa drejtori të policive të qarqeve ka pasur lëvizje masive të kuadrove, ku “të preferuarit” e eprorëve, apo edhe të atyre që kanë mbështetje të fortë politike apo nga biznesi, kanë marrë poste kyçe.
Po çfarë pritet të ndodhë në Policinë e Shtetit? Boldnews.al ka mësuar se ministria e Brendshme, në bashkëpunim me Policinë e Shtetit, i kanë dërguar disa propozime Këshillit të Ministrave, për sistemin e gradave të oficerëve madhorë. Në këto propozime, më e rëndësishmja është mënyra e marrjes së gradës pa konkurruar në Akademinë e Sigurisë.
VKM-ja që pritet të dalë në javët në vijim do tu japë gradë madhore në polici të gjithë oficerëve që drejtojnë një sektor, komisariat apo drejtori. Përshembull, nëse një drejtor i policisë në qarqe nuk ka gradën e duhur për të drejtuar atë drejtori, VKM-ja ia jep gradën, që përkthehet më pas në rrogë më të mirë.
E gjithë kjo lëvizje bëhet me qëllim që të favorizohen disa prej të “përkëdhelurve” nga eprorët e policisë, apo të Ministrisë së Brendshme. Në pritje të kësaj VKM-je, ka filluar një “luftë” e egër në radhët e policisë.
Gjatë javëve të fundit ka pasur me dhjetëra emërime të disa oficerëve në sektorë kyç të policisë, me qëllimin e vetëm që të marrin gradën madhore kur të miratohet VKM-ja. Pasojat mund të jenë fatale, pasi mësohet se në këto poste janë vendosur oficerë të pakualifikuar, që në të ardhmen do të jenë “fytyra” e re e policisë.
Disa ditë më parë, ka hyrë në fuqi struktura e re e Policisë së Shtetit. Menjëherë më pas, janë larguar 170 punonjës në disa qarqe policie në rrethe. Shtimi i komisariateve të reja, shtesat e disa sektorëve të rinj në polici apo shkurtimi i disa sektorëve të tjerë, po përpunohen prej javësh nga specialistët e Policisë së Shtetit, për të mundësuar implementimin e strukturës së re.
Ministri Tahiri konfirmoi disa ditë më parë se policia po punon për implementimin e plotë të strukturës së re, teksa së fundmi janë shfaqur një sërë problematikash, ku më e rëndësishmja është ulja e pagave për 2 mijë efektivë policie.
