Presidenti i Partisë së Lirisë, Ilir Meta, ka reaguar në lidhje me humbjen e jetës së Armond Peshku në minierën e Martaneshit, ku mbeti i plagosur rëndë edhe një tjetër minator.
Meta përmes një postimi në rrjetet sociale shkruan se tragjedia e sotme është një ngjarje e paralajmëruar dhe e përsëritur.
Sipas tij, Rilindja ka për qëllim vetëm të vjedhë dhe të ndajë pasuritë publike me shfrytëzuesit e minierave, oligarkët.
Ndër të tjera Meta shprehet se, po nga Rilindja, minatorët sot nuk kanë as status dhe asnjëlloj përfitimi për punën e vështirë.
Reagimi i plotë:
Tragjedia e sotme në minierën e Martaneshit, ku humbi jetën 29-vjeçari, Armond Peshku dhe disa të tjerë u plagosën është e paralajmëruar dhe e përsëritur.
“Rilindja” ka qëllim vetëm të vjedhë dhe të ndajë pasuritë publike me shfrytëzuesit e minierave, oligarkët, dhe nuk i bëhet vonë fare për minatorët që as ilaçe nuk blejnë dot për të kuruar mushkëritë dhe sakrifikojnë aq shumë për bukën e gojës sa humbin edhe jetën.
Partia e Lirisë i ka përkrahur gjithmonë minatorët e mashtruar nga “Rilindja” që sot nuk kanë as status minatori dhe asnjë lloj përfitimi për punën e vështirë, që kanë kryer.
Ne i mbështesim të gjitha propozimet e minatorëve, veçanërisht për miratimin e statusit të minatorit, të përfitimit të 135% të pagës minimale, si dhe të garantimit të plotë të shërbimeve shëndetësore falas, përfshi ilaçet për kurimin e sëmundjeve kronike që u janë shkaktuar nga nëntoka.
Ngushëllime familjes së 29-vjeçarit Armond Peshku që humbi jetën sot në minierën e Martaneshit dhe shërim të shpejtë të plagosurve!
