Gjkykata e Beratit ka dënuar me 17 vite burg shtetasen Dashuri Shkurti, teksa është shpallur fajtore për veprën penale “Trafikimi i personave të rritur”. Sipas gjykatës, ka prova të mjaftueshme se Dashuri Shkurti në bashkëpunim me shtetasit E.M. dhe F.D. ka kryer veprën penale për të cilën u akuzua me veprime aktive ka rekrutuar, transportuar në shtetin Italian, viktimën M.S., me qëllim shfrytëzimin për prostitucion.
Më konkretisht, Dashuri Shkurti akuzohet se ka trafikuar në vitin 2018 nusen e djalit në Itali për prostitucion, teksa e kërcënonte se nëse do të fliste apo do ta denonconte në Polici, ajo do t’i vriste mamanës. Pasi e ka marrë nusen e djalit në Itali, Dashuri Shkurti e ka ndaluar të takohet dhe komunikojë me persona të tjerë apo familjarë, duke iu bindur çdo urdhri të saj.
“E pandehura Dashuri Shkurti e ka rekrutuar, transportuar dhe trafikuar nga Berati në Vlorë e më pas në shtetin Italian, nëpërmjet fshehjes dhe formës së ngjashme me skllavërimin duke e ndaluar të takohet dhe komunikojë me persona të tjerë dhe familjarët, duke e detyruar që t’i bindej çdo urdhri të saj. Ajo e ka trafikuar viktimën M.S., fakt ky i provuar edhe nga deklarimet e viktimës, se e pandehura i ka thënë- ti do të vish në Itali dhe po hape gojën të shkosh në polici ne do të vrasim mamanë.
Viktima, shtetasja M.S. ka deklaruar se rreth muajit Shkurt të vitit 2018 ka qenë e papunë dhe e asistuar nga shërbimet sociale të qytetit të Beratit është njohur me të pandehurin E.M., njohje e cila pas pak kohësh është zyrtarizuar dhe në familjet e tyre. Pas përfundimit të ceremonive përkatëse ajo ka shkuar të jetojë tek banesa e të fejuarit i cili përgjithësisht e trajtonte mirë por shumë shpejt nisën dyshimet për sinqeritetin e të pandehurit kur gjatë një bisede në rrjetin social facebook, ajo e prezantuar në komunikim me të ëmën e tij, shtetasen D.S. dhe ka zbuluar planin për dërgimin e saj në Itali.” – thuhet në vendimin e Gjykatës së Beratit.
Prokuroria ka kërkuar dënimin me 22 vite burgim të Dashuri Shkurti, por gjykata ka vendosur përfundimisht ta dënojë me 17 vite burgim.
