Mentor Kikia, teksa komentoi marrjen në pyetje nga SPAK të zv/kryeministres Belinda Balluku, tha se për herë të parë u pranua se ka pasur abuzime për çështjen e inceneratorëve.
Kikia theksoi se është i rëndësishëm deklarimi i Ballukut kur tha se “mbështesim SPAK-un për të ndarë punën e ndershme nga abuzimi i pafalshëm”.
“Me vajtjen e zonjës Balluku në prokurori shënon disa zhvillime të reja. E para supozohet se po shkon drejt fundit hetimi. U pyet Veliaj, tani u pyet Balluku në cilësinë e ministres. Ajo që është e rëndësishme është deklarimi i zonjës Balluku kur tha se mbështesim SPAK-un për të ndarë punën e ndershme nga abuzimi i pafalshëm. Është hera e parë që pranohet sepse historia e inceneratorëve mbrohet si histori suksesi. Mendoj që kjo përbën thelbin e qëndrimit që mund të ketë mbajtur.
Në kuadër të konspiracionit, zonja Balluku njihet si rivale e Veliajt dhe dëshmitë intereferojnë në këtë linjë. Që do të thotë se në këtë sipërmarrje paska pasur një abuzim të pafalshëm dhe zbardhjes së kësaj çështje zonja Balluku i ka shërbyer me dëshminë e saj. Qytetarëve nuk i intereson sesi është konfiguruar lufta politike në dyert e SPAK dhe si përkthehet rivaliteti politik brenda një partie në dyert e drejtësisë ku njerëzit hanë kokat e njëri-tjetrit në dyert e drejtësisë, njerëzve u intereson të zbardhet e vërteta. Pyetja është pse nuk u ndërhy”– tha Kikia në “Open” në News 24.
