Vetëmbytja e Alma Arrazit dhe tre fëmijëve të saj të mitur në lumin Buna, ishte një nga ngjarjet më të rënda të raportuara në vendin tonë. Hetimet vijojnë dhe bashkëshorti i saj, Erdgys Arrazi ndodhet i arrestuar nën dyshimet se ka qenë ai që e ka shtyrë 39-vjeçaren drejt aktit të rëndë të vetëflijimit e po ashtu edhe të mbytjes së fëmijëve.
Gazetarja Anila Hoxha, e ftuar në Top News ka zbardhur detaje të reja, ku tha se Erdgysi, burri i të ndjerës, prej një muaji nuk kishte më afrimitet me Almën dhe se kishte fshirë dhe të gjitha mesazhet që kishte pasur në telefon.
Po ashtu, gazetarja shtoi se ai kur dilte me të dashurën e tij, minorene, bllokonte thirrjet në telefon nga Alma, në mënyrë që të mos shqetësohej. Anila Hoxha tha se Alma ishte larguar së fundmi nga shtëpia, teksa Erdgysi ia kishte djegur të gjitha rrobat.
Ky i fundit, sipas gazetares, i kishte dërguar një mesazh dhe kunatës, ku i kërkonte llogari “pse s’më tregove që Alma më pa?” duke iu referuar dëshmisë së saj se pak para ngjarjes, e ndjera e kishte parë atë në makinë së bashku me të dashurën.
“Erdgysi ka djegur rrobat e Almës pasi ajo ishte larguar nga shtëpia, kjo është provuar edhe nga prokuroria. Erdgysi, sa herë dilte nga banesa i bënte bllok Almës, që të mos e shqetësonte. Erdgysi i dërgoi një mesazh kunatës ku i thoshte “pse nuk më tregove që më kishte parë”. Nuk është pyetur vetëm kunata në prokurori, por edhe babai, motra dhe vëllai i Almës.
Erdgysi ka fshirë nga telefoni të gjitha bisedat me Almën që kishte kryer prej 1 muaji. Alma magjithatë shpresonte se do ia dilte të ruante familjen. Për sa kohë ajo ka shpresuar dhe e ka falur, ka vazhduar të qëndrojë deri sa e ka parë me të dashurën. Alma kishte lidhje të fortë me kunatën, ajo është e tronditur. Ka kamera të tjera të sekuestruara, që i kanë kaluar prokurorisë. Janë dy biznese të tjera ku është bërë kërkesë që të administroheshin kamerat e sigurisë”, u shpreh gazetarja Hoxha.
