Zëvendëskryeministri i kabintetit të ri të Qeverisë serbe, Aleksandar Vulin ka reaguar ashpër në lidhje me mitingun që kryeministri Edi Rama mbajti në Athinë këtë të dielë, nisur dhe nga fakti i tentativës së Greqisë për njohjen e Kosovës.
Zëvendëskryeministri serb kërkon nga Greqia që të formojnë një aleancë anti-shqiptare. Sipas Vulin, njohja e Kosovës nga Greqia dhe pranimi i Kosovës në Këshillin e Evropës, do të ishte një kontribut i pamatshëm i qeverisë greke dhe Dora Bakoyanis në krijimin e Shqipërisë së Madhe.
Ai deklaron se Shqipërinë e Madhe mund ta ndalin vetëm bota serbe, por pse jo sipas tij, edhe grekët, duke iu shtrirë dorën për bashkëpunim.
“Herën tjetër që qeveria e Greqisë të mendojë për njohjen e të ashtuquajturës Kosovë, le të kujtojë se si duket pritja e Edi Ramës në mes të Athinës. Atë që Rama nuk mundi ta përjetonte në Tiranë, e përjetoi në Athinë.
Njohja e të ashtuquajturës Kosovë nga autoritetet greke dhe pranimi i Prishtinës në Këshillin e Evropës, do të ishte një kontribut i pamatshëm i Qeverisë së Greqisë dhe Dora Bakoyanis në krijimin e Shqipërisë së Madhe. Shqipëria mund të ndalet vetëm nga serbët dhe bota serbe, por edhe nga ju grekë të dashur, grekët tanë. Ju lutem mendoni për këtë.” – ka deklaruar Aleksandar Vulin, raportojnë mediat e huaja.
Kjo nuk është hera e parë që Vulin përmend termin “Shqipëri e Madhe” për të shantazhuar apo kërcënuar një shtet tjetër. Zëvendëskryeministri serbe, përpara se të merrte detyrën, iu drejtua Malit të Zi me fjalë tepër ofenduese për shkak të mbështetjes së rezolutës për gjenocidin në Srebrenicë të paraqitur në OKB.
“E ardhmja e ish-serbëve është Shqipëria e Madhe. Ose ta thuash në gjuhën e rrjedhshme malazeze: ‘Burrat e mëdhenj u bënë frikacakë dhe tradhtarë’”, ka thënë Vulin disa ditë më parë.
