Drejtori i Përgjithshëm i Policisë së Shtetit, Muhamet Rrumbullaku ka reaguar në lidhje me vrasjen e efektivit të “Shqiponjave”, Novruz Cenalia në fshatin Baltëz të Fierit, teksa autori i krimit Azgan Mernica është ende në kërkim.
Përmes një deklarate për mediat, Rrumbullaku zotohet se do të bëjë gjithçka për ta vendosur para ligjit autorin e vrasjes së Novruz Cenalisë.
Ai shton më tej se uniforma e Policisë së Shtetit është e shenjtë dhe kushdo që guxon të cënoje shëndetin dhe jetën e punonjësve të Policisë, do të marrë përgjigjen më të ashpër ligjore
Deklarata e Muhamet Rrumbullakut:
“Policia e Shtetit dhe unë personalisht ndjehemi thellësisht të tronditur nga vrasja e punonjësit të policisë Novruz Cenalia, mesditën e 13 Majit 2024. Ndarja e parakohshme nga jeta e një djali të ri si Novruz Cenalia na ka hidhëruar të gjithëve, familjen e tij, është në lot e zi, dhe familjen e madhe të Policisë së Shtetit. Për të gjithë ne, kjo dhimbje bëhet edhe më e hidhur kur jeta e një punonjësi të Policisë së Shtetit ndërpritet nga dora e një vrasësi, që ende është i lirë.
Unë zotohem në emër të Policisë së Shtetit se. do të bëjmë gjithçka për ta vendosur para ligjit autorin e vrasjes së Novruz Cenalisë. Shpreh bindjen se i gjithë opinioni publik ndodhet sot përkrah familjes Cenalia dhe Policisë së Shtetit dhe do të ndihmojë në kapjen e autorit të krimit. E kam theksuar me forcë, edhe pak ditë më parë, gjatë ceremonive perkujtimore për të rënët e policisë, se uniforma e Policisë së Shtetit është e shenjtë. Kushdo që guxon të cenoje uniformën e policisë, shëndetin dhe jetën e punonjësve të saj, do të marrë përgjigjen më të ashpër ligjore”
