Pas deklaratës për operacionin e sekuestrimit të rreth 97 kg lëndëve narkotike, drejtori i Policisë së Shkodrës, Edmond Sulaj u pyet nga gazetarët dhe në lidhje me dy ngjarjet e ndodhura së fundmi që tronditën qytetin verior.
Bëhet fjalë për mbytjen e 39-vjeçares Alma Arrazi së bashku me tre fëmijët e saj të mitur në lumin Buna, si dhe për vendosjen e tritolit pak javë më parë në banesën e gjyqtarit Tonin Sterkaj, të cilat janë ende të pazbardhura.
Sulaj tha se të dyja ngjarjet janë të rënda, teksa deklaroi se hetimet vazhdojnë. Ai theksoi se është ende herët për të folur për rezultatet, por u shpreh se Policia e Shkodrës i ka kapacitetet për të hetuar ngjarje të tilla.
“Në këtë ngjarje kemi qenë shumë transparent. Sa i takon të rejave le të lemë grupin hetimor që të vazhdojë hetimet”, tha Sulaj për rastin në familjes Arrazi.
Ndërsa për tritolin në banesën e gjyqtarit Tonin Sterkaj, drejtori i policisë tha: “Po punojnë intesivisht. Është herët për të folur për rezultate konkrete, drejtoria e policisë Shkodër i ka kapacitetet profesionale për të hetuar ngjarje të tilla”
