Një “shtëpi bari” është zbuluar nga Policia e Tepelenës, me qindra bimë kanabisi të mbjella dhe një pjesë në proces tharje.
Bëhet fjalë për një banesë të pabanuar në fshatin Veliqot, të cilin e kishin përshtatur për kultivim të bimëve narkotike në vazo, nëpërmjet llambave që furnizoheshin me lidhje të paligjshme të energjisë elektrike
Autoritetet policore raportojnë se në kuadër të operacionit të koduar “Closed” kanë shpallur në kërkim shtetasit: D. Xh., 27 vjeç, banues në fshatin Veliqot (pronari i banesës) dhe E. Sh., 47 vjeç, banues në Sarandë, bashkautorë në këtë veprimtari kriminale.
Uniformat blu kanë sekuestruar në cilësinë e provës materiale 249 bimë narkotike të mbjella në vazo, 25.35 kg lëndë narkotike cannabis sativa, llamba, pajisje ventilimi dhe sende të tjera që i shërbenin kësaj veprimtarie kriminale.
Policia po punon për kapjen e dy personave të shpallur në kërkim dhe për dokumentimin e plotë të kësaj veprimtarie kriminale. Materialet procedurale i kaluan Prokurorisë së Gjirokastrës për veprime të mëtejshme.
