Drejtoria e Burgjeve i ka dhënë leje Erdgys Arrazit për të marrë pjesë në ceremoninë e varrimit të dy fëmijëve të tyre të mitur, vajzës 8 vjeçe dhe djalit 3 vjeç, të cilët u mbytën në lumin Buna bashkë me motrën e tyre Ergesën 9 vjeçe dhe nënën e tyre Alma Arrazi.
Dy fëmijët e mitur do të përcillen ditën e sotme për në banesën e fundit, teksa vajzës 9-vjeçare iu dha lamtumira e fundit dy ditë më parë. Ata nuk do të prehen në të njëjtin vend me nënën e tyre Alma Arrazi (Bushati), pasi prindërit e kësaj të fundit e kanë tërhequr trupin dhe do e varrozin në Durrës, pranë të ëmës.
Erdgys Arrazi u arrestua nga Policia e Shkodrës pasi akuzohet se ka shtyrë bashkëshorten e tij Alma Arrazi, bashkë me tre me fëmijët e tyre të mitur drejt vetëvrasjes.
Nga hetimet e deritanishme dyshohet se Alma Arrazi është hedhur nga ura e lumit të Bunës mbrëmjen e 2 majit bashkë me tre fëmijët e saj. Në kamerat e sigurisë, 39-vjeçarja është parë se para vetëflijimit, ka pirë kafe me kunatën, me të cilët është ndarë qetësisht.
Një ditë më pas, më 3 maj, Erdgys Arrazi ka denoncuar në polici largimin nga banesa të gruas me fëmijët. Por, kur një peshkatar i zonës gjeti të pajetë trupin e 9-vjeçares Ergesa, ai u kthye në të dyshuarin kryesor për shkaktin e vetëvrasjes së bashkëshortes dhe tre fëmijëve të tij.
Dyshohet se Erdgys Arrazi ushtronte dhune fizike e psikologjike ndaj 39-vjeçares e fëmijëve dhe vetëflijimi dyshohet se është pasojë e dhunës në familje. Po ashtu, ai dyshohet se e tradhëtonte bashkëshorten e tij, për të cilën Alma kishte marrë dijeni.
Avokatët e Erdgys Arrazit kanë pretenduar në gjykatë se 39-vjeçarja vuante nga probleme të shëndetit mendor, duke paraqitur një prej recetave mjekësore të saj të lëshuar nga mjeku Gjon Preçi me firmën dhe vulën e tij.
