Drejtori i Përgjithshëm i Policisë së Shtetit ka firmosur pezullimin nga detyra të efektivit Jonuz Koçi, me detyrë trup shërbimi për ruajtjen dhe sigurimin e objektit të Policisë Shkencore. Gjithashtu, ai është vënë nën hetim disiplinor për shkelje të rëndë.
Ky vendim është marrë pasi efektivi Jonuz Koçi u denoncua nga emisioni “Fiks Fare” se shantazhonte një qytetare se do t’i publikonte fotot nudo dhe i kërkonte 3 milionë lekë të vjetra për mospublikimin e tyre.
Gruaja që denoncoi rastin ka treguar për emisionin Fiks Fare se policin Jonuz Koçi dhe të shoqen e tij Liri Koçi, i ka njohuir kur punonte në treg kur ata po kërkonin për qiraxhinj. Kështu në apartamentet që ata jepnin më qira çoi njerëz të saj.
Denoncuesja qiraxhinjtë i kishte të afërm dhe shkonte shpesh i vizitonte, pasi ata e morën vesh këtë filluan ta shantazhonin duke i thënë se kemi video të tuat që vjen në banesën, por më kryesorja se ata kishin foto nudo të saj duke e shantazhuar.
Polici bashkë me të shoqen për mospublikimin e tyre i kërkonin denoncueses 3 milion lekë të vjetra. Në këto kushte denoncuesja pohon se ua dha paratë që kërkuan, por që më vonë mësoi nga rrethi i saj shoqëror se polici u kishte treguar miqve të tij se dispononte foto të saj nudo, madje u kishte treguar që e kishte shantazhuar dhe se ishte paguar.
Reagim i Policisë së Shtetit:
Në lidhje me rastin e transmetuar në emisionin investigativ “Fiks-Fare”, në Top Channel, ku një punonjës policie kishte shantazhuar një shtetase dhe i kishte marrë një shumë parash për të mos i publikuar fotot, ju bëjmë me dije se:
Drejtoria e Standardeve Profesionale në Policinë e Shtetit me urdhër të Drejtorit të Përgjithshëm të Policisë së Shtetit, në zbatim të Nenit 222, pika 8 të Rregullores së Policisë së Shtetit ka bërë pezullimin e menjëhershëm nga detyra të punonjësit të Policisë, Inspektor J.K, me detyrë trup shërbimi për ruajtjen dhe sigurimin e objektit të Policisë Shkencore dhe ndaj tij ka nisur hetimin disiplinor për shkelje të rëndë.
Ndërkohë Agjencia e Mbikëqyrjes Policore ka nisur menjëherë hetimin penal ndaj punonjësit të Policisë.
Policia e Shtetit falenderon mediat dhe qytetarët që denoncojnë rastet e abuzimit me detyrën të punonjësve të Policisë dhe i fton sërish ata, që të denoncojnë çdo rast të tillë, duke i’u garantuar reagim të menjëhershëm e të paanshëm.
Punonjësi i Policisë së Shtetit shantazh qytetares: 3 milionë lekë ose të publikova fotot nudo
