Borussia Dortmund ka arritur për herë të tretë në historinë e klubit të kualifikohet në finalen e Ligës së Kampionëve, duke u rikthyer për të luajtur aktin e fundit të kompeticionit për herë të parë që nga sezoni 2012/13.
Në një shfaqje spektakolare në “Parc des Princes” gjermanët kanë triumfuar edhe në gjysmëfinalen e dytë ndaj PSG-së me rezultatin 0-1.
Ndeshja ka qenë pothuajse e dominuar totalisht nga francezët, por në fund është rezultati ai që merret parasysh.
Goli i sfidës erdhi në minutën e 50-të, me Hummels i cili dërgoi topin në portën e PSG-së. Krosimi i Brandt nga këndi u shfrytëzua mirë nga mbrojtësi, që me kokë mposhti Donnarumman.
Rezultati i përgjithshëm i kësaj përballjeje ishte 0-2 për Dortmund, dhe kështu gjermanët bëhen finalistët e parë të Champions League për këtë sezon.
Me finalen e arritur, e gjithë vëmendja është te ndeshja e nesërme ku Real Madrid pret Bayern Munchen në Bernabeu pas barazimit 2-2 në sfidën e parë.
A do të ketë një përsëritje të finales së 2013-ës apo Bellingham do të sfidojë ish-ekipin e tij në ndeshjen kulminante të futbollit europian? E gjitha zgjidhet nesër në mbrëmje.
