Një grup mësuesish protestuan këtë të mërkurë, ku kërkonin rritje pagash dhe kushte më të mira, teksa paralajmëruan se do futen në grevë urie nëse do të ketë reagim nga qeveria.
Kreu i PD-së, Sali Berisha, gjatë fjalës së mbajtur në tubimin e sotëm e ka konsideruar kauzën e tyre si të drejtë, ku sipas tij, janë mësuesit më të keqpaguar në rajon dhe në Europë. Berisha u beri thirrje mësuesve që të bashkohen me demokratët kundër “hajdutëve”.
“Miqtë e mi, sot është 1 Maji. Sot, një grup mësuesish guximtarë protestuan para kryeministrisë dhe kërcënuan për grevë urie për shkak të poshtërimit, të nënçmimit që regjimi i narkoshtetit të Edi Ramës iu ka bërë atyre në këto 11 vite për shkak të rrënimit katastrofal të shkollës sonë. Të dëbimit të butë të qindra mijëra nxënësve nga Shqipëria. Për shkak të rënies së tmerrshme vertikale të cilësisë së arsimit në këto vite. Por unë sonte kam një thirrje për të gjithë mësuesit e Shqipërisë. Bëhuni luftëtarë të drejtë të kauzës suaj. Ju sot jeni mësuesit më të keqpaguar në rajon dhe në Europë dhe mos harroni se në vitin 2013 ju ishit mësuesit më të mirëpaguar në rajonin tonë. Por në qoftë se ju sot jeni mësuesit më të përçmuar dhe të keqpaguar, jeni të tillë sepse fondet e bollshme që ekzistojnë për 2 dhe 3 fishimin e rrogave tuaja, janë vjedhur, vjedhur dhe vetëm vjedhur nga qeveritarët aktualë. Të dashur mësuese, mësues, mjekë, infermierë, punonjës të shërbimeve të tjera, mbroni kauzën tuaj. Kauza juaj është kauzë e drejtë. Bashkohuni me ne, se beteja jonë kundër hajdutëve që zhdukin në bankat offshore, që zhdukin në pallate dhe hotele luksoze qindra milionë euro, është edhe kauza juaj. Është kauzë e drejtë. Të bashkuar ne firmosim të sigurt më shpejt fitoren që meritojmë.” – tha Berisha.
Gjithashtu, Berisha u bëri thirrje edhe profesionistëve të lirë që t’i bashkohen protestës për shkak të taskimit 15% që u vendosi qeveria.
“Kam një thirrje të veçantë për ata dhjetëra mijëra specialistë dhe ekspertë të profesioneve të lira, shërbëtorë të nderuar të qytetarëve shqiptarë. Bashkohuni me ne për padrejtësinë e madhe që u ka bërë Edi Rama. Bashkohuni me ne të përballemi dhëmb për dhëmb jo vetëm për veten, por për fëmijët tanë, për mbarë shqiptarët. Studenteve dhe studentëve, gjimnazistëve dhe gjimnazisteve iu bëj një thirrje zemre, ngrihuni në lartësitë e ëndrrës suaj se ju, se familja, se Shqipëria nuk ka asgjë më të bukur se ëndrrën tuaj të bëhet realitet. Bashkohuni me ne se sot ju jeni të rinjtë më të përçmuar, më të injoruar, por edhe më të poshtëruarit. Ju meritoni të ardhmen. E ardhmja juaj është e ardhmja e ndritur e Shqipërisë dhe shqiptarëve. Sot i duheni Shqipërisë ju. I duheni shumë me guximin tuaj. Me trimërinë tuaj. Jepjani asaj një dorë, një mbështetje se ajo do ua shpërblejë ju dhe fëmijëve tuaj.” – tha Berisha.
