Janë zbardhur detaje të reja nga shpërthimi me tritol i regjistruar në orët e para të mëngjesit të kësaj të diele në banesë e gjyqtarit Tonin Sterkaj në Shkodër.
Burime për mediat pranë grupit hetimor bëjnë me dije se kamerat e sigurisë kanë filmuar autorin dhe momentin e hedhjes së lëndës plasëse.
Mësohet se bëhet fjalë për një person i veshur me rroba të errëta dhe i maskuar në pjesën e sipërme të kokës. Ai vjen në këmbë, hedh sasinë e lëndës plasëse në derën e oborrit të banesës së gjyqtarit Sterkaj dhe po ashtu në këmbë largohet sërish përmes rrugicave.
Ai mbetet ende i paidentifikuar nga grupi hetimor, teksa mësohet se po verifikohen kamerat e sigurisë në një rreze më të largët se vendi i ngjarjes për të lokalizuar autorin.
Ndërkohë gjyqtari Sterkaj ka qenë brenda banesës kur ka ndodhur shpërthimi së bashku me familjen e tij. Pasi ka dëgjuar zhurmën ka dalë në ballkon, por pa e ditur se tritoli ishte vendosur në derën e tij. Një komshi e ka njoftuar dhe më pas ka vërejtur se ngjarja lidhet me të.
Gjyqtari Sterkaj në dëshminë e dhënë për policinë e Shkodrës, ka thënë se dyshon se kjo ngjarje lidhet me detyrën e tij si gjyqtarë në gjykatën e Shkodrës por pa e patur të qartë se për cilin rast mund të bëhet fjalë konkretisht. Ai ka deklaruar se nuk ka dijeni se kush mund të jetë autori apo porositësi.
“Nuk kam dijeni se kush e ka bërë, unë jam gjyqtar dhe kam çështje penale çdo ditë në gjykim”, mësohet të ketë thënë ai.
Ngjarja u regjistrua rreth orës 03:13 të mëngjesit në lagjen “Tom Kola” të qytetit verior. Si pasojë e shpërthimit nuk pati persona të lënduar, por vetëm dëme materiale.
Dyshimet e para të grupit hetimor janë se motivi i ngjarjes lidhet për shkak të detyrës së gjyqtarit Tonin Sterkaj. Ai është gjyqtar pranë Gjykatës së Shkalles se Parë të Juridiksionit të Përgjithshëm Shkodër. Vendosja e lëndës plasëse në derën e oborrit të banesës së gjyqtarit Tonin Sterkaj dyshohet se është një mesazh kërcënues ndaj tij.
Policia dyshon se autori që ka vendosur lëndën plasëse është paguar nga dikush tjetër.
Njoftimi i Policisë së Shkodrës:
“Rreth orës 03:13, në lagjen “Tom Kola”, Shkodër, tek porta e oborrit të banesës së shtetasit T. S., 62 vjeç, (me detyrë Gjyqtar në Gjykatën e Shkallës së Parë të Juridiksionit të Përgjithshëm Shkodër) është hedhur lëndë plasëse. Si pasojë janë shkaktuar vetëm dëme materiale.
Shërbimet e Policisë po vijojnë kontrollin në zonë.
Ndërkohë grupi hetimor po vijon veprimet në vendngjarje për sigurimin e provave me qëllim identifikimin dhe kapjen e autorit/ve.”
