E paralajmëruar për të ndodhur në datën 9 Maj, një vizitë e mundshme e Presidentit turk Rexhep Taip Erdogan në Uashington për t’u takuar me homologun e tij amerikane, Joe Biden, është veshur me mister.
Fillimisht gjithçka tregonte se takimi në Shtëpinë e Bardhë ishte caktuar për në datën 9 maj, ndërsa raportimet e mediave e lanë ta hapur mundësinë se mes konflikteve në Lindjen e Mesme dhe zërit të ngritur të Erdogan ndaj Izraelit, takimi edhe mund të mos realizohej.
Sot, dy javë para datës 9 maj, të cilën Bloomberg e ka përcaktuar si datën kur do të takohen, përfaqësuesi i Sigurisë Kombëtare të Shtëpisë së Bardhë, John Kirby në një deklaratë për mediat ka raportuar se nuk ka asnjë vizitë të planifikuar të presidentit turk Erdogan në Uashington.
Në veçanti, i pyetur nëse takimi i Erdoganit me liderin e Hamasit Haniyeh do të jetë një çështje në takimin me Biden apo nëse do të rrezikojë vizitën e presidentit turk, Kirby u përgjigj: “Nuk ka asgjë në plan për të folur për një vizitë specifike të presidentit Erdogan. Pra, nuk kam asnjë koment për këtë”.
I pyetur se kush e pret liderin e Hamasit, Kirby tha: “Përsëri, do ta lë presidentin Erdogan të flasë në takimet që ka. Ne kemi qenë shumë të qartë për pozicionin tonë ndaj Hamasit dhe kush janë ata dhe çfarë përfaqësojnë”.
“Do ta lë me kaq”, shtoi Kirby.
Në të njëjtën kohë, agjencia amerikane Bloomberg, duke cituar burime të njohura me këtë çështje, raporton se takimi në Shtëpinë e Bardhë më 9 maj është i sigurt që do të zhvillohet.
