Komisioni hetimor parlamentar për koncesionet në shëndetësi (sterilizimin dhe check up-i) do të mblidhet sërish ditën e sotme, ku mbledhja pritet të nisë në orën 11:00.
Në mbledhjen e kaluar palët nuk arritën dakordësinë për të miratuar planin e hetimit dhe kjo pikë do të diskutohet sërish sot. Pritet që plani i hetimit të integrojë të dy draftet e propozuara nga palët.
Në rendin e ditës është futur edhe miratimi i kërkesave për informacion, të cilat vazhdojnë të qëndrojnë të bllokuara prej deputetëve socialist. Ditën e djeshme, në një dalje për mediat, kryetarja e këtij komisioni, Albana Vokshi akuzoi socialistët se me urdhër të Edi Ramës po bllokojnë punimet dhe po bëhen pengesë për miratimin e kërkesave për informacion, drejtuar institucioneve.
Plani hetimor i opozitës parashikon që në listën e dëshmitarëve të thirret kryeministri Edi Rama, ish ministrat Beqaj e Manastirliu, ministrja Koçiu etj. Ndërsa mazhoranca ka propozuar që hetimet të shtrihen që nga viti 2009. Sipas PS-së duhet të pyeten edhe Ministrat e Shëndetësisë që nga dhjetori i 2006 si dhe të gjithë ish drejtuesit e QSUT që nga 1 tetor 2009.
Vokhsi ka deklaruar se opozita është e gatshme dhe se nuk e ka problem këtë gjë, por sipas saj, nuk e lejon kuadri ligjor i ngritjes së këtij komisioni, i cili parashikon si hetime që prej nisjes së dy koncesioneve që janë në fokus të komisionit.
Rendi i ditës:
